09/01/2022

An Nowodhow: an 9ves a vis Genver 2022 Dohajydh da, ha dynnargh dhe dhyllans an seythen ma 'An Nowodhow' war BBC Radyo Kernow. *Galarans gesyer kernewek Jethro a hwarvos dy’Lun dhe Benneglos Truru.Ev a verwis mis Kevardhu, tredhek ha tri ugens bloodh y oos, wosa ev dhe gavos Kovid-19 herwydh y deylu.An gesyer, dhyworth Eglosveryan, Geoffrey Rowe y hanow gwir, a hedhis tornya y’n vledhen 2020 wosa moy ages hanter kans bledhen.Gras a veu aswonis dhodho dres an bys komedi.Dres an galarans an gesyer Jim Davidson a gewsis ha’n bagas ilow The Oggymen a sonas an ilow, yn hy mysk kana Trelawny.Possybyl o dhe vires orth an galarans warlinen hag yth esa kansow a dus ow kul revrons dhe’n keskerdh hag ev ow tremena Truru.Teylu Jethro re wovynnas argevrohow dhe vos danvenys dhe Children’s Hospice South-West. Sarah Stott, dhyworth Little Harbour hospice yn Sen Ostell a leveris “Pur vovyes en ni i dhe dybi ahanan y’n pols kales ma. Henn a styr meur ha ni a dhanvon agan grassow gans oll agan kolon dhedha.” *Yma kussul rag neuvyoryon yn Porth Bud erbynn usya pol mor wosa diskargansow karthyon dhyworth fenansow dowr hager awel.Kannas Pol Mor Porth Bud a leveris yma “argol yeghes” byth pan ober fenansow dowr hager awel.Skeusen an pol dy’Gwener usi passys a dhiskwedh ewon gell, genys gans methynnow hag a veu golghys y’n mor gans glaw poos.Dowr Soth West a lever fenansow “a wra ober res ha pur bosek” avel “klack sawder laghel rag lesta karthpibow rag dos ha bos gorhergys.”Pol Mor Porth Bud re beu “harber rag badhya heb kost ha salow hag aktivitys dowr erel a-dhia an bledhynnyow mil naw kans deg warn ugens” herwydh aga gwiasva.Mes post war an wiasva dy’Gwener a leveris “Pol Mor Porth Bud a gussul an dus erbynn usya an pol dres an nessa nebes dydhyow.”Kaderyer an pol, Paul Tilzey y hanow, a leveris: “Yma argol yeghes ha hwi ow neuvya y’n mor, ytho y’n pol ynwedh byth pan dhiskarg Dowr Soth-West karthyon dhyworth aga frenansow.
An kudyn yw, Dowr Soth-West a yll gul henna. Nyns yw res henna dhe hwarvos y’n bys arnowydh.”
Yma govenek dhodho an ewon gell “a vydh gyllys” wosa “kopel a vorlanow moy.”*Ynkressyans yn niver gwelyow morviles humpback yn dowrow an Ruvaneth Unys yw arwodh bositiv restoryans an eghen dhyworth pyskessa morvil kenwerthel, herwydh konygyon.
Bagas Trest Godhvewnans a leveris yth esa “gwelyow marth” a orcas ha pyffyers dres an vledhen ugens onan warn ugens.
Byttegyns, an alusen a warnyas aktivitys tus a woderris bewnans morek.
Moy ages deg cetacean hag eth ugens a veu gesys yn Kernow y honan y’n dewdhek mis usi passys ha dew kans seyth ha dew ugens a reunes. Lies a veu shyndys gans aktivitys pyskessa.
Pyffyer, Nick y hanow, estemyas gans neuvyoryon yn Kernow, a dhredhedhas yn Iwerdhon gans goliow yn akord gans damach rakherdhell.
Trest Bewnans Gwyls Kernow a leveris i dhe rekordya seytek gwel morviles humpback. Kyns henn o gwel fest ankemmyn yn dowrow an Ruvaneth Unys.
An somm yw pymthek gwel ha tri ugens a-dhia dhiw vil ha nownsek. Yma tybyans an eghen dhe helghi hesow hern usi yn dowrow an ranndir lemmyn.
*Yma’n alusen Kernewek ShelterBox owth assaya gweres an dus y’n Enesow Felyp wosa an tornado Rai a frappyas an enesow mis Kevardhu.*Yth esowgh hwi ow koslowes orth ‘An Nowodhow’ war BBC Radyo Kernow. An dowlen an seythen ma a veu skrifys ha presentys genev vy Kensa Broadhurst. An pennskrifer o Steve Harris. Bys dy’ Sul nessa, dydh da dhywgh hwi oll.