31/10/2021

An Nowodhow: an 31ves a vis Hedra 2021
Dohajydh da, ha dynnargh dhe dhyllans an seythen ma 'An Nowodhow' war BBC Radyo Kernow.
Eseli senedh Gernewek a demond gweres dhyworth an governans rag dyghtya “hager awel berfydh” y’n kevreyth yeghes.
An seythen eus passys Trest Klavjiow Kernow Riel a dheklaryas hwarvedhyans kritikel wosa demond bras dres eghen.
Y feu moy ages kans godhevyas ow kortos yn asran goredhom desinyas rag dew ugens, ha pymp karr-klavji warn ugens ow kortos a-ves.
Herwydh kevarwodher medhek an trest klavjiow yma’n desedhans ow kwellhe yn lent.
*
An arghantti unnik war Syllan a wra degea nessa bledhen.
Arghantti Lloyds a wra degea y skorr war Sen Maria an pympes warn ugens a-vis Ebrel.
Perghen bosti war’n enys, Phil Moon y hanow, a leveris “jagg” o, hag y fydh kalessa dhe esekutya y negys.
Herwydh Arghantti Lloyds an ervirans o drefen bos chanjys yn fara prenoryon ow styrya an skorr dhe vos usyas le menowgh.
Mester Moon a leveris: “Ni a gollas Barclay’s nans yw diw vledhen, ha Lloyd’s a dheuth ha bos an arghantti unnik war’n enys, ytho ny wrussyn ni gweles henna ow tos.”
Ev a leveris y negys a us an arghantti yn fenowgh rag kavos mona ha rag kemeres arghans dhe-ves rag diogelegh.
Herwydh Arghantti Lloyds arvethesigyon a vydh kavadow rag kussulya ha skoodhya prenoryon.
Kannas a leveris: “Arghanser kemeneth nowydh a vydh kavadow rag gweres prenoryon gans aga daffar arghantti pubdydhyek ha prenoroyon a yll pesya dhe usya arghantti leel dres vysytya an sodhva post yn ogas, kerdh berr dhyworth an skorr.”
*
Lewyader jynn-ebron, Andy Wilkins y hanow, a sawyas y honan jynnow-ebron byghan a dal a-dro dhe vilvil peuns dhyworth tan.
Yth esa Mester Wilkins ow triga yn caravan war ayrborth Bosvena pan glewas ev tardh ughel.
Ha flammow ha mog ow lesa dres unn drehevyans jynnow-ebron, an dyskador neyja a herdhyas nebes jynnow-ebron dhe sawder yn-mes.
Ev a veu hedhis gans Gonis Tan ha Sawyans Kernow pan dhrehedhsens i war an welva “drefen bos an mog nebes tynn.”
“My a dheuth yn-mes ha gweles flammow ow tos yn-mes, my a pellgewsis orth 999, ha wosa my a erviras an nessa ragwir o dhe gemeres an jynnow-ebron yn-mes an drehevyans, “ Mester Wilkins a leveris.
“Posek yns i dhyn ha dhe’n klub nejya Kernow ytho my a’ga hemeras yn-mes poran, nebes serth ov an myttin ma,” ev a leveris.
Mester Wilkins a allas herdhya eth jynn-ebron yn-mes an drehevyans ryb dalleth an tan, ow kwruthyl torr tan.
Kaderyer Klub Neyja Bosvena, Darren Fern y hanow a leveris: “Mars o kellys oll an jynnow-ebron, yma ogas dhe vilvil peuns a jynnow-ebron omma ha Andy a’ga sawyas.”
“An Gonis Tan ha Sawyans a wrug ober splann dhe gontaynya an tan mes dres gwakhe an drehevyans jynnow-ebron ryb an tan, yth esa torr tan dhyn rag sawya oll an jynnow-ebron erel, ytho dhe wul henna, ogas y honan, o ober marthys da.”
Yth esa dhe Wonis Tan ha Sawyans Kernow pymp jynn tan war’n welva dhe dhelya gans an hwarvedhyans.
*
Yma kresennow bryghlinans Kovid-19 ygerys lemmyn rag fleghes ynter dewdhek ha pympthek bloodh.
An bryghlinansow yw profys ryb an dowlen yn skolyow hag yma edhom a vodh kerensek.
Possybyl yw ragherghi apoyntyansow warlinen rag Klavji Kernow Riel ha Park Fer Krowswynn, Ponswad.
Pub flogh ynter dewdhek ha pympthek bloodh a yll kavos kynsa dogen an bryghlinans.
Yth esowgh hwi ow koslowes orth ‘An Nowodhow’ war BBC Radyo Kernow. An dowlen an seythen ma a veu skrifys ha presentys genev vy Kensa Broadhurst. An pennskrifer o Steve Harris. Bys dy’ Sul nessa, dydh da dhywgh hwi oll.