22/08/2021

An Nowodhow: an 22ves a vis Est 2021 
Dohajydh da, ha dynnargh dhe dhyllans an seythen ma 'An Nowodhow' war BBC Radyo Kernow. *Kath dov, Piran y hanow, a weresas ledya sawysi dh’y ferghenoges, tri ha peswar ugens hy oos, neb a godhas unn meter warn ugens yn-nans kownans yn Kernow gledh. Kannas an Kreslu a leveris i dhe hwilas an venyn pan glewas esel an poblek Piran ow miowal. An son ma a ledyas an sawysi dhe’n fethesigores. Hi re godhsa yn-nans an leder yn ogas, may ma “hedhas pur gales ha dor ankompes” hag yn gover.“Piran an gath a sawyas an jydh,” a leveris kannas Kreslu Bosvena yn kever an sawyans, an pyth a hwarvos ogas dhe Bonswad. An venyn a veu drehevis dhe sawder war gravath gans an tanlu ha kemeres dhe glavji gans tro askel klavji. An ganaseth sawyans a veu lonchys dy’Sadorn dohajydhweyth pan fonyas kentrevogyon orth an servisyow goredhom. Yth esa bern dhedha yn kever an tyller may ma an venyn. An venyn, neb re bia kellys dres moy ages unn our, re godhsa ogas dh’y chi.Herwydh dustuniores, tro an moyha posek rag kavos an venyn o miowal “pur barghus” dhe Biran dhyworth penn an kownans.“Keslowena bras yw dhe oll an servisyow goredhom neb a oberas warbarth, ha dhe Biran” hi a leveris. “An diwedh a via gwettha.” *Bysi yw Lizzie Stroud ha hy gour, David y hanow, owth eylafina kocha hynshorn drehevys rag An Vyghternes Victoria.Yth yw onan a naw kochys hynshorn re brensons dres an bledhynnyow. Yma pymp anedha parys hwath rag rentya.An hwedhel a dhallathas y’n vledhen mil naw kans dewdhek ha peswar ugens pan brensons i an drehevyans gorsav yn Lannaled.
I a’n treylyas y’n chi rag aga theylu, drefen bos edhom dhedha kavos tyller affordyadow rag triga ynno.
Yth esa towl an kynsa kocha dhe dhos ha bos stevel parys rag kothmans ow vysytya, mes a-dhia henna, eylafina ha rentya kochys hynshorn a dheuth ha bos negys leun-dermyn.
“Ni a dylis seyth peuns warn ugens rag dew gocha war’n wiasva eBay,” yn-medh Mestres Stroud, “pur rust ens i mes brassa rann an kostys yw rag aga movya, aga astiveri hag aga eylafina .”
“Pan gevsyn ni an kocha riel, nyns o an tyller parys mes res o dhyn y vovya distowgh, ytho y kevsyn ni neb le rag y witha dres unn vledhen. Res o dhyn y vovyva diwweyth ha pub prys kost o peswar mil ha pymp kans a beunsow.”
*Pyskador a veu frappyas gans “mordon anwaytys” dh’y vernans dhyworth kerrek, dell veu derivys dhe hwithrans mernans.
Yth esa Tyler Westlake ow pyskessa ogas dhe Vreanek, mis Du eus passys, pan hwarva an hwarvedhyans.
Y gothmans a veu frappyas gans an mordon ynwedh hag i ow fardella aga daffar pyskessa, mes i a allas skramblya orth sawder.
Kouronor henavek, Andrew Cox y hanow, a rekordyas ervirans mernans dre wall.
An trajedi a hwarvos ha glaw keynresek ha hager awel ow fusta an Ruvaneth Unys.
*Possybyl o rag tus dhe’n gool Boardmasters yn Tewynblustri kavos aga bryghlin Kovid-19 kyns i dhe dhiberth.
An gool a hwarvos rag an kynsa termyn a-dhia dhiw vil hag etek.
Yth esa medhegva yn unn park kerri rag an dus ow tiberth dy’Lun.
Herwydh NHS Kernow an servis o rag an kynsa po an nessa dogen bryghlin.
Yth esa govenek dhe Tracey Hemborough, dhyworth bagas Atlantic Medical, y fydh meur a dus ow tos.
Yn-medh hi: “Yma govenek dhyn wosa pubonan re omlowenhas nebes dydh splann a ilow byw ha gul an traow a garons, y hallsens kemmer chons dhe gavos aga bryghlin.”

*Yth esowgh hwi ow koslowes orth ‘An Nowodhow’ war BBC Radyo Kernow. An dowlen an seythen ma a veu skrifys ha presentys genev vy Kensa Broadhurst. An pennskrifer o Steve Harris. Bys dy’ Sul nessa, dydh da dhywgh hwi oll.