Wrth edrych ymlaen at wyliau Gorffennaf - Elis Dafydd

Wrth edrych ymlaen at wyliau Gorffennaf

Nid ar egwyddor yr heidiwn i’r trefi
gyda’n pebyll, carafanau a booking
confirmations gwestai rhad.

Nid mater cydwybod wedyn, chwaith,
ydi dawnsio a meddwi a mwydro mwy
na’n harfer, a thaflu’n pryder i’r brain

sy’n aros cyfle yn hyrddiadau’r gwynt.
Nid gwneud pwynt gwleidyddol yw mwynhau ein hunain.
Ond eto, o heidio o bedwar ban

cawn weld nad ofer ein breuddwydion chwaith
wrth weld tystion glannau Taf a phrofi
fod digon ohonom i gynnal gŵyl. Cawn glywed

Wnion yn firi i gyd yn suo’r nos i gysgu a ger Seiont
wedyn cawn deimlo’n chwithig, ella,
fod rocyrs â’u gwalltiau cyrliog yn

bloeddio’n bodolaeth yng nghlustiau’r byd o grud
ein darostyngiad.

Nid dim-ond-gŵyl mo unrhyw ŵyl,
ac wrth lenwi’r car a throi am adra,
bydd gobaith yn cyniwair ar unwaith am “flwyddyn nesa”.