le Cathy NicDhòmhnaill

Dè tha gnìomhachas an fhànais a' ciallachadh do dh' Alba? Le iomairtean airson puirt-fànais air feadh na dùthcha - eadar Sealtainn agus Uibhist - cha bheag na cothroman a tha an cois leudachadh buaidh mhic an dùine air na speuran. Ach a bheil buannachdan ann dhuinn ann an dha-rìribh? Tha an innleadair Naomi Mitchison agus am fear-naidheachd Aonghas Dòmhnallach - aig a bheil ùidh mhòr le chèile sa chuspair - còmhla rinn gus beachdachadh air freagairt na ceist.

Air ais air an talamh fhèin - dè cho Neanderthal is a tha mac an duine? Ged a tha dealbh againn dhen t-seann sheòrsa sin de mhac an duine ris an canar Neanderthals mar bhrùidean amaideach... tha e coltach gu bheil na gineachan aca fhathast nar ceallan chun a' latha an-diugh. Cionnas agus carson? Tha an t-eòlaiche ginideachd, an t-Oll. Alasdair MacCoinnich, a' freagairt nan ceistean sin dha Cathy.

Dè tha fàgail rudeigin "cool" - neo, air a' chaochladh, "uncool"? 'S e facal a th' ann a chluinneas tu gu math tric sa Bheurla ach aig a bheil ciall is eadar-theangachadh eadar-dhealaichte - ach dè am freagairt a th' air a' cheist? Tha Iain MacCarmaig, Sìne NicDhòmhnaill, agus Shannon NicIlleathain a' beachdachadh air a' ghnothaich.

Agus tha sreath ùr againn a' tòiseachadh ron Nollaig - gach seachdain, tha cuideigin a' moladh leabhar neo-fhicsean dhuinn, a bhiodh iomchaidh mar phreusant Nollaig. 'S e The Early Life of James McBey: An Autobiography a thagh an sgrìobhadair Graham Cooper - agus tha e còmhla rinn gus innse carson.