Màiri Mhòr nan Òran: Dealbh-chluich

Tha sinn air a bhith a' comharrachadh 200 bliadhna bho rugadh a' bhana-bhàird Màiri Mhòr nan Òran air a' bhliadhna seo. B' ann a Sgeabost san Eilean Sgitheanach a rugadh i agus b' ann san eilean a chuir i seachad làithean a h-òige. Ghluais i a dh'Inbhir Nis agus phòs i greusaiche, Ìosac Mac a' Phearsain, san t-Samhain 1847 agus bha seachdnar chloinne aca. Chaochail Ìosac ann an 1871 agus thàinig air Màiri a dhol a dh'obair mar shearbhanta.

Ann an 1872, chaidh cuir às a leth gun do ghoid i aodach bhon tè aig an robh i ag obair fhad 's a bha seirbheis an tòrraidh aice a' dol air adhart. Chaidh a' chùis a dhearbhadh na h-aghaidh agus fhuair i binn dà fhichead latha sa phrìosan. B' ann an dèidh seo a thòisich i ri bàrdachd, oir mar a dh'innis i fhèin, "S e na dh'fhuiling mi de thàmailt a thug mo bhàrdachd beò."

A seo ann an dealbh-chluich a chaidh a sgrìobhadh le Catrìona NicGumaraid, a chaidh a chlàradh ann an 1981, tha sinn a' faighinn dealbh air mar a chaidh dhi sa chùirt agus mar a dh'fhàg sin i cho 'sgìth de luchd na Beùrla'. Cluinnidh sinn cuideachd feadhainn de na h-òrain aice air a sheinn.

A' cluiche Màiri Mhòr nan Òran tha Ceana Chaimbeul. Tha Ailean Dùbhghlas bho phaipear-naidheachd an Inbhir Nis air a chluiche le Calum Ros. Tha luchd na cùirte air an cluiche le Donaidh Mac a' Ghobhainn, Murchadh Macleòid 's Eàirdsidh Friseal agus tha Seònaid Fhriseal, a thug seachad fianais an aghaidh Màiri, air a cluiche le Dolina NicIllFhinnein.