Rubha an Dùnain agus Gleann Conan

Tha Seumas Dòmhnallach a’ tòiseachadh a' phrògraim mu dheireadh san t-sreath seo ann an àite eile air nach bi mòran a’ tadhal, Rubha an Dùnain ann am Minginis. B’ i dachaigh eachdraidheil Chlann ‘ic Asgaill a bha seo gus an do dh’ fhàg iad anns an 19mh linn. A’ coiseachd còmhla ri Seumas tha Cailean MacGillEathain aig a bheil dlùth cheangal ris an àite agus do Chlann ‘ic Asgaill air taobh a mhàthar. Tha Cailean a’ sealltainn do Sheumas na tha ri fhaicinn agus a’ mìneachadh dha an ceangal a tha esan a’ faireachdainn ris an àite san là a th' ann. Tha Seumas an uair sin a’ fàgail taobh siar an Eilein agus a’ dèanamh a shlighe air ais mu thuath gu ruige Thròndarnais a' bhruidhinn ri Seumas Caimbeul ann am Baile nan Cnoc ann an Gleann Conan. Seo àite a tha fìor ainmeil am measg luchd-turais san là a th’ ann mar am ‘Fairy Glen’. Tha atharrachaidhean mòra air tighinn air an àite seo agus tha Seumas ag innse mun cheangal a th’ aige fhèin ris an sgìre.