Feall

Tha Seumas Dòmhnallach air a bhith a’ rannsachadh dàimh dhaoine ri seann bhailtean an Eilein Sgitheanaich agus anns an dàrna prògram san t-sreath seo tha e a’ dol gu ceann a tuath sgìre Thròndarnais gu ruige làrach baile eile, Feall. A’ seasamh am measg thobhtaichean an t-seann bhaile tha e doirbh gun a bhith a’ smaoineachadh air cò na daoine a bha an seo aig aon àm, cò ris a bha am beatha coltach agus dè a thachair dhaibh.
Tha Seumas a' dol air chuairt gu ruige Feall còmhla ri tè a tha eòlach air an àite agus air seanchas co-cheangailte ris. Tha dàimh làidir aig Calina Dhòmhnallach ris a' bhaile. Chaidh a cuideachd am fuadach às agus tha sgeulachdan tìomhaidh aice mun là a b’ fheudar dhaibh an teine a chur às agus an dachaigh fhàgail.