Aonghas Greumach am Baile Ghobhainn

'S e prògraman as an t-sreath An Tac an Teine a th' againn dhuibh an t-seachdain s' gach madainn aig leth uair an deidh naoi - sreath far am biodh Dan Moireach a' còmhradh ri daoine, mar a shaoileadh sibh, an tac an teine. Ach an-diugh, 's ann a tha Dan air sràidean Bhaile Ghobhainn an Glaschu.

Bha Aonghas Greumach à Griais na iar-neach-gairm air Comhairle nan Eilean Siar airson còig bliadhna bho 1994 agus na chomhairliache bho 1983. Ron a sin thionndaidh e a làmh ri iomadach rud - eadar a bhith sa Chabhlach Mharsanta 's a' fighe chlòitean, gu bhith ag obair an gàraidhean Chiseòrn agus Àranais. Rugadh e ann a 1948 agus b' ann am Baile Ghobhainn a thogadh e, còmhla ri athair 's a sheanmhair, gus an tàinig e 'dhachaigh' agus a chaidh e a Sgoil a Bhac.

A seo tha e a' cuimhneachadh air na làithean sin nuair a bhiodh e a' bleigeardachd na bhalach òg; air na turais dhachaigh a Leòdhas air an trèana agus air a' 'steamer'; air Talla Bhaile Bhaile Ghobhainn agus air Govan Cross; air gàradh iarainn Harland and Wolff far a robh athair ag obair, agus air an atharrachadh a bha air a thighinn air a' sgìre nuair a chaidh e fhèin is Dan Moireach cuairt ann an 1990.

Bhàsaich Aonghas aig aois 60 ann an 2008.