Prògram 2

Chan eil sgioba rugbaidh mnathan Steòrnabhaigh air a bhith còmhla ach airson 3 bliadhna agus thairis air an ùine sin, tha iad air dùblachadh nan àireamh agus air na sgilean aca a leasachadh agus a leudachadh às dèidh gach gèam. An toiseach, 's e geamannan càirdeil a bhiodh iad a' cluiche, ach ann an 2019 thòisich iad a’ ghabhail pàirt ann an geamannan farpaiseach, ann an Cupa Sarah Beaney agus anns a' lìog, agus chaidh iad faisg air Murrayfield a ruighinn.

Anns a’ phrògram seo, coinnichidh sinn ri dithis eile bhon sgioba, Courtney NicIllÌosa agus Donna Mhoireasdan, an tè is sine anns an sgioba, agus iad le chèile ag innse cho tarraingeach 's a tha rugbaidh.

Mar a h-uile spòrs eile, tha tàmailt is briseadh dùil ann nuair nach eil cùisean a’ dol leotha. Ach dhan an sgioba seo, tha iad ag ionnsachadh bho gach gèam a tha iad a’ cluich. A’ coimhead air ais air mar a chaidh dhaibh ann an 2019, tha iad gu math misneachail a’ tòiseachadh seusan ùr agus cò aig a tha fios nach ann a' cluiche air pàirce Murrayfield a bhios Gillebrìde ‘s a chlann-nighean san ùine a tha romhainn!