Air chèilidh tha Iain MacNèill à taobh siar Leòdhais

Dà uair a thìde de chòmhradh agus ceòl air leth còmhla ri Iain Mac'illeMhìcheil, a' craoladh beò à Glaschu. An t-seachdain sa, bidh sinn a’ cur fàilte air fear de Ghàidheil Ghlaschu, Iain MacNèill à Càrlabhagh air taobh siar Leòdhais.
Thàinig Iain a Ghlaschu an toiseach ann an 1959 agus tha e air a bhith a’ tàmh sa bhaile riamh bhon uair sin.
Tha e air a bhith an-sàs ann an Comann Leòdhais is na Hearadh Ghlaschu thar iomadh bliadhna, mar ionmhasair agus mar cheann-suidhe agus tha e cuideachd aithnichte mar chleasaiche, gu h-àraid bho a chuid eirmseachd is fealla-dhà anns an tachartas bhliadhnail, Oidhche Challainn.
Tha ùidh mhòr aige ann an spòrs, gu h-àraid ball-coise agus tha e air a bhith a’ leantainn sgioba Rangers bho aois glè òg. Tha e air leth fiosrachail a thaobh eachdraidh na sgioba sin agus bidh e tric a’ nochdadh mar eòlaiche air prògraman spòrs Radio nan Gàidheal.
Cluinnidh sinn seanchas Iain, agus ceithir roghainnean ciùil pearsanta. Mar as àbhaist cuideachd, bidh measgachadh math de sheinneadairean is còmhlain aig Mac'lleMhìcheil fhèin dhuinn. Tha iad sin uile air an taghadh eadar Country, Americana is ceòl traidiseanta, le seann òrain agus feadhainn a tha buileach ùr air an clàradh.