Air chèilidh tha Murchadh MacLeòid às Na Hearadh

Dà uair a thìde de chòmhradh agus ceòl air leth, còmhla ri Iain Mac'illeMhìcheil, a' craoladh beò à Glaschu. An t-seachdain sa, 's e Murchadh MacLeòid à ceann a deas Na Hearadh a bhios na chuideachd.
Thòisich Murchadh ag obair aig a’ BhBC ann an 1975. Stèidhich e dhreuchd an sin mar neach-rannsachaidh, agus ‘s iomadh prògram aithriseach – an dà chuid air telebhisean agus rèidio – air an do dh‘obraich e thar nam bliadhnaichean. Leig e dheth a dhreuchd ann an 2017.
Tha Murchadh air leth dèidheil air a bhith a’ ruith, agus a’ sreap. Tha e air soirbheachadh ann a bhith ruighinn mullach iomadh “Munro” an Alba, a bharrachd air beanntan nam “Furths” ann an Sasainn, A’ Chuimrigh agus Èirinn. Tha aige fhathast ris a' chùis a dhèanamh air co-dhiù fichead de na beanntan “Graham.” A thaobh ruith, tha Murchadh air còrr is fichead rèis a dhèanamh air Beinn Neibhis, ach ‘s iad rèisean Dhiùra as fheàrr leis.
Ma thèid aig Murchadh ri suidhe aig fois fad dà uair a thìde, cluinnear ‘s dòcha a chuid sheanchas! Mar as àbhaist cuideachd, bidh measgachadh math de sheinneadairean is còmhlain aig Mac'illeMhìcheil fhèin dhuinn. Tha iad sin uile air an taghadh eadar Country, Americana is ceòl tradiseanta, le seann òrain agus feadhainn a tha buileach ùr air an clàradh.