29/03/2019

Dà uair a thìde de chòmhradh agus ceòl air leth, còmhla ri Iain Mac'illeMhìcheil, a' craoladh beò à stiùidio a' BhBC ann an Glaschu. An t-seachdain sa, ’s i Katie NicAonghais, oileanach aig Oilthigh Ghlaschu a bhios air chèilidh. Tha Katie 19 bliadhna a dh’aois agus tha i an-dràsta a’ cur crioch air an dàrna bliadhna aice san oilthigh, a’ dèanamh ceum ann an Gàidhlig. ’S ann às na Lochan, Eilean Leòdhais a tha i. Am-bliadhna, tha i cuideachd a’ dèanamh Sociology agus Eachdraidh. ’S toil leatha a bhith ag èisteachd ri ceòl traidiseanta/Folk agus a’ cluich na fìdhle.
Bidh Katie cuideachd a’ lìbhrigeadh Breab do Rapal air Radio nan Gàidheal gach mìos agus ’s toil leatha a bhith an sàs ann an diofar phròiseactan a thaobh cleasachd, ceòl, cànan agus na meadhanan.
Cluinnidh sinn seanchas Khatie, agus ceithir de na roghainnean ciùil pearsanta aice. Mar as àbhaist cuideachd, bidh measgachadh math de sheinneadairean is còmhlain aig Mac'illeMhìcheil fhèin dhuinn. Tha iad sin uile air an taghadh eadar Country, Americana is ceòl Ceilteach, le seann òrain agus feadhainn a tha buileach ùr air an clàradh.