Air chèilidh a-nochd bidh Seonag Anderson

Dà uair a thìde de cheòl air leth agus còmhradh beòthail cuide ri Iain Mac'illeMhìcheil, a' tighinn thugaibh beò à stiùidio a' BhBC ann an Glaschu. Còmhla ris an t-seachdain sa tha tè air am bheil luchd-èisdeachd Radio nan Gaidheal eòlach, tron iomadh chuspair air am bi i tric a’ toirt beachd – eadar biadh, ceòl, bàrdachd, eachdraidh na sgìre aice fhèin agus gu leòr eile. Is ise Seonag Anderson, ban-Uibhisteach a th’ air a bhith bliadhnaichean a’ fuireach ann an Inbhir Nis far am bheil ì na h-Oifigear a’ Mhòid aig A’ Chomunn Gàidhealach. Tha fios gum bi craic gu leòr a’ dol, is i-fhèin ‘s Mac'illeMhìcheil a’ cuir fàilt’ air an deireadh-sheachdain còmhla.
Cluinnidh sinn seanchas Sheonag agus ceithir de na roghainnean ciùil pearsanta aice. Agus mar as àbhaist, bidh measgachadh sgoinneil de sheinneadairean is còmhlain aig Iain fhèin dhuinn. Tha iad sin uile air an taghadh eadar Americana is Country/Country & Western, le seann òrain agus feadhainn a tha buileach ùr air an clàradh.