Episode 198

Às leth boireannaich na rìoghachd bha a' Bhanrigh Màiri air sgrìobhadh, an t-seachdain sa bho chionn ceud bliadhna, gu na fir a bha sabaid ag innse cho moiteil agus a bha i ast' agus bha Sir Dùghlas Haig air freagairt.

Ann an Tiriodh choinnich comataidh a chaidh a stèidheachadh airson airgead a thogail mar phàirt de dh'iomairt air an robh Scottish War Weapons Week. Dh'innis an t-Urramach Iain Stiùbhart gu robh muinntir an eilein air suim mhòr a chruinneachadh - luach aon phlèan 'Scout' agus deich grad-ghunnaichean.

Faisg air Ypres chaidh Seumas MacLeòid à Calanais ann a Leòdhas a mharbhadh. B' e an aon mhac a bh' aig Iseabail NicLeòid a bha a' fuireach aig an àm ann an Steòrnabhagh. Cha robh Seumas ach còig bliadhna deug is dà sheachdain nuair a ghabh Rèisimeid Earra-Ghàidheal agus Shutharlann e, an dèidh dha a ràdh gu robh e seachd bliadhna deug is dà mhìos. Cha deach lorg fhaighinn air corp Sheumais a-riamh agus cluinnidh sinn bho Ghilleasbuig MacDhòmhnaill mun litir thiamhaidh a sgrìobh a mhàthair gu Oifis Clàraidh an Airm ann am Peairt.