Conaltradh - Nan NicFhionghuin

Ma tha thu a' lorg eachdraidh neo òran à Barraigh 's dòcha gur e an stiùireadh a b' fheàrr a gheibheadh tu a dhol dhan tasglann agus ainm Nan NicFhionghuin a lorg. Le còrr air mìle sgeulachd agus còrr air còig cheud òran, tha fhios gum biodh tu gu math riaraichte às dèidh do rannsachadh! Tha Karen Elder am measg ginealach an là an-diugh a bhios a' cur seachad ùine air làrach-lìn Thobar an Dualchais agus chan eil e na ioghnadh sam bith gur ann air ainm Nan a bhios i a' bruthadh gu math tric. Anns a' phrògram seo tha Karen a' toirt thugainn taghadh à tasglann a' BhBC agus à clàraidhean a rinn Tormod Dòmhnallach còmhla ri Nan ann an 1975. Tha òrain is sgeulachdan aice ann am pailteas anns an leth-uair seo.