Episode 165

Thòisich Blàr Rathad Menin, pàirt de Threas Blàr Ypres, air an 20mh den t-Sultain 1917. Bha comanndair Dara Arm Bhreatainn, an Seanalair Herbert Plumer, air plana a dhealbh airson faighinn seachad air siostam-dìon na Gearmailt, agus chaidh fheuchainn an toiseach sa bhlàr seo.
Chun a seo, cha robh na Gearmailtich a' dèanamh oidhirp mhòr sam bith air a' chiad loidhne aca a dhìon ach, nuair a bhristeadh na Breatannaich troimhe dhan dara loidhne, bha aonadan ghunnaichean-luath romhpa an sin a bha cur stad orra. Bha na Gearmailtich an uairsin a' tighinn air adhart luath on chùl - is mar as trice a' buannachd air ais an talamh a chaill iad. Cluinnidh sinn bho Ghilleasbuig MacDhòmhnaill mar a dh'atharraich Seanalair Plumer cùisean leis a' phlana ùir.