An t-Urr Tormod MacSuain

Anns an t-seirbheis cluinnidh sibh na sailm is na leughaidhean a leanas:
Salm 62 : 7-8 air fonn London New agus 's e Aonghas MacSuain a tha os cionn na seinn le taic bho choitheanal Eaglais Shaor Sgalpaigh.
Salm72: 17-19 air fonn Torwood agus 's e Iain Aonghas Dòmhnallach a tha os cionn na seinn le taic bho choitheanal Eaglais na h-Alba air an Tairbeart.

Leughadh: Lùcas 4: 14-21
Ceann-teagaisg: Gnìomharan nan Abstol 8: 5-8

B' ann do dh'Eilean Sgalpaigh a bhuineadh an t-Urr Tormod MacSuain. Rugadh e anns a' Ghiblean 1920. Nuair a bha e deiseil anns an sgoil lean e ann an lorgan athar agus, mar iomadach Sgalpach eile, chaidh e a dh'iasgach, gnìomhachas a bha gu math soirbheachail aig an àm sin air an eilean.

Leig e seachad obair an iasgaich ann an Sgalpaigh agus chaidh e a-staigh airson na ministrealachd. Seach gun do dh'fhàg e an sgoil aig 14 bha obair aige ri dhèanamh airson teisteanas fhaighinn a leigeadh leis a dhol dhan cholaiste airson trèanadh. Le cuideachadh is taic bho mhaighstir-sgoile an eilein, tidsearan agus ministear an àite, fhuair e air e fhèin ullachadh airson a dhol gu Colaiste Skerry, far an d'fhuair e teisteanas a thug dhan oilthigh e.

Chaidh e a dh' Oilthigh Dhùn Èideann agus an uair sin gu Colaiste na Diadhachd airson trì bliadhna.

Thoisich Mgr MacSuain na dhreuchd mar mhinistear ann an Eilean Bharraigh. Lean an càirdeas eadar e fhèin, agus a bhean Sophie, ri muinntir an àite airson ùine mhòr às dèidh dhaibh an t-eilean fhàgail, agus bha meas mòr aig muinntir Bharraigh air Mgr MacSuain.

Thairis air na bliadhnaichean a bha e a' searmonachadh chuir Mgr MacSuain seachad ùine ann an coitheanalan ann an Earra-Ghàidheal, sna Hearadh agus mu dheireadh ann a sgìre Cheann Loch ann a Leòdhas. Leig e seachad a dhreuchd às dèidh sin.

Ged a bha e air a dhreuchd mar ministear-paraiste a leigeil seachad, bha e air leth trang na sheaplain aig Ospadal Leòdhais agus air Ospadal nan Eilean airson iomadach bliadhna. Bha luchd-obrach is luchd-frithealaidh an ospadail measail air Mgr MacSuain airson an seòrsa duine a bh' ann agus an nàdar a bh' aige. Bha ùidh mhòr aig Mgr MacSuain cuideachd anns a' Ghàidhlig.

Bha e pòsta aig Sophie agus bha triùir theaghlach aca - nighean agus dithis ghillean. Bhàsaich Mgr MacSuain anns a' Chèitean 2008 agus bhàsaich a bhean Sophie anns a' Mhàirt 2015.