Episode 1

Bha sinn duilich an naidheachd a chluinntinn gun do bhàsaich Eilidh NicDhòmhnaill, Eilidh an Tàilleir à Grìminis aig deireadh na Sultain aig aois 98. Choinnich Angela NicFhionghuin ri Eilidh airson a' chiad turas air madainn ann a 2014 agus ro dheireadh an fheasgair a bha sin bha iad air sgeulachd a beatha a chlàradh. Agus abair sgeulachd!

Ged a bha Eilidh a' fuireach ann an Grìminis, rugadh agus thogadh i san Iochdar. Bha i 91 nuair a chaidh seo a chlàradh, ach dha coimhead agus dha h-èisteachd cha chanadh duine gu robh i mòran seachad air an trì fichead. Thug Eilidh dhuinn cunntas gu math mionaideach air a beatha thairis air an t-sreath. Anns a' chiad phrògram cluinnidh sinn mu làithean-sgoile ann an Sgoil an Iochdar 's iad a' feitheamh ri 'Cailleach na Doags' airson ceòl agus mar a bha iad trang a' fuaigheil 'lap-bags'. Cluinnidh sinn cuideachd mar a chaidh Eilidh a dh 'obair a dh' Essex aig aois 15 agus mar a chuir caileag òg às an Iochdar eòlas air tortoise - beathach nach robh cumanta ann an Uibhist a Deas anns na 30an!