"Macron giflé" [slap]: French President 'Emmanuel Macron receive slap for face in Drôme'

One man don slap French President Emmanuel Macron for face during one official visit wey e do go southeast of France.

President Macron receive di slap as e dey waka up to one barrier during di trip to Tain-l'Hermitage outside di city of Valence.

For di video wey dey circulate for social media, one man wey wear green T-shirt slap Macron for di face before officers quickly move in.

French president bodyguards come pull Macron away. Authorities don arrest two men sake of dis incident, according to French media.

As di man slap di president, e shout di words "Down with Macron-ism."

For di video, oga Macron briefly return back to di barrier wey di incident for happun and once again greet di crowd.

Politicians don quickly condemn wetin happun.

Prime Minister Jean Castex tell di National Assembly just afterwards say democracy must not mean violence.

Castex say while democracy mean debate and legitimate disagreement "it must neva in any case mean violence, verbal aggression and even less physical attack"

Far-left leader Jean-Luc Mélenchon say "solidarity with di President" immediately afta di slap.

And far-right leader Marine Le Pen post her own condemnation, and tok say "while democratic debate fit dey bitter, e no go eva tolerate physical violence".

President Macron currently dey on one tour of France and bin just visit one hotel school for Tain-l'Hermitage.

Macron visit to di area go continue on Tuesday, officials tok with one trip to one vocational institute for 25-30 year-olds.

Di French president visit dey come a day before French bars and restaurants go dey able to reopen to indoor customers afta seven months of closure.

Authorities don also push back France overnight curfew from 21:00 to 23:00 on Wednesday.

Who dey protect President Macron?

French presidents dey protected by di Security Group for di Presidency of di Republic, wey dem know as GSPR.

Dem set up GSPR for 1983 and report say e dey made up of composed of 77 men and women to protect president Macron during events.

According to French TV channel BFM, officers go search round locations before any presidential visit. Dem go come send armed personnel to closely guard di president on di trip.

Di channel reports say 10 members of di GSPR dey with president Macron for on Tuesday trip.