Ghana election petition: John Mahama, Tsatsu Tsikata file fresh application to inspect 6 documents of Ghana EC

Flag bearer of de NDC John Mahama file fresh application for Supreme Court of Ghana to inspect some 6 documents of de Electoral Commission.

Counsel for John Mahama, Lawyer Tsatsu Tsikata inform de court of dema decision to inspect de original copies of de EC documents which he say go determine if dem go call more witnesses.

In de application, de legal team of John Mahama dey ask for original constituency presidential election results collation forms for all de constituencies (form 9), originals for all de constituency presidential election results summary sheets (form 10).

Also dem ask for originals of de regional presidential election collation forms (form 11) den de regional presidential election results summary sheets (form 12) for all 16 regions of Ghana.

De last batch of documents dem demand be original copy of de declaration of presidential results form (form 13) den finally updates of results from four constituencies for Greater Accra.

Supreme Court order first den second respondents in de election petition say dem for turn in dema response by close of Tuesday, February 2, 2021 ahead of hearing de next day.

Asiedu Nketia cross examination done, Kpessa-Whyte go mount witness box as second witness for John Mahama

Cross examination of Johnson Asiedu Nketia end on Monday after two days of grilling from de lawyers, second witness Kpesa-Whyte go mount witness box morrow on behalf of John Mahama.

Counsel for Nana Akufo-Addo, Lawyer Akoto Ampaw continue to cross examination de first witness of John Mahama.

According to spokespersons for Nana Akufo-Addo, dema cross examination today expose de inconsistencies and lies of de petitioner, John Mahama den en witness, Asiedu Nketia.

"Counsel on wanna side try expose de inconsistencies of de petitioner… we play videos which dey show dem claim say dem win de election but dem b=no back dis claim plus figures," Kojo Oppong Nkrumah talk.

"We expose claim say nobody win de election…If you fry it, you bake it, you turn it upside down or you cook, still de figure be 51 percent plus for de second respondent, wey de petitioner get around 47 percent."

While de Nana Akufo-Addo camp be positive say de cross-examination expose John Mahama witness, legal team for de NDC Flagbearer believe say de witness discharge en body well for de witness box inside.

Supreme Court adjourn sitting go morrow, where de second witness for John Mahama go mount de witness box for cross examination.