Prime Minister Liz Truss new cabinet: Kwasi Kwarteng as chancellor, James Cleverly as foreign secretary - Check who dey for Liz Truss top team?

Prime Minister Liz Truss don appoint her new cabinet, hours afta she take ova for 10 Downing Street.

For di first time, no white man hold any of di great offices of state, wit Suella Braverman as home secretary, Kwasi Kwarteng as chancellor and James Cleverly as foreign secretary.

Dis na di guide to di new faces and role wey don change.

Newcomers include ministers who bin no attend di most recent cabinet.

Make you click hia if you no fit see di Cabinet Guide

Thérèse Coffey - Deputy Prime Minister/Health Secretary

Thérèse Coffey na di health secretary, she dey take over from Stephen Barclay wey don only dey di role for two months.

And go also be deputy prime minister.

Di former work and pensions secretary na long-time friend of Liz Truss and she closely get hand for her leadership campaign.

Kwasi Kwarteng - Chancellor

Kwasi Kwarteng, one key ally of Liz Truss, get appointment as chancellor.

Kwarteng replace Nadhim Zahawi wey only take di role afta Rishi Sunak resign for July.

Kwarteng wey come from Ghana gbab scholarship to Eton at di age of 13.

And im go on to study history for Cambridge University, eventually get a PhD for British history.

Di British-Ghanaian also bin dey part of one series-winning team on University Challenge.

James Cleverly - Foreign Secretary

James Cleverly don become foreign secretary, e take ova di new prime minister former department.

Cleverly don be education secretary since July but na minister for di Foreign Office.

Dat time im dey responsibile for Europe and North America, wen Russia invade Ukraine for February.

Di son of one midwife and one small business owner get private education.

And im be member of di London Assembly, wia im become a friend of Boris Johnson.

Suella Braverman - Home Secretary

Suella Braverman replace Priti Patel as home secretary, making her one of di big winners for Liz Truss first cabinet.

As she don run for leadership herself, Braverman, one ogbonge Brexit supporter, declare her support for her former rival soon afta dem eliminate her from di contest.

Dem don promote her from di role of attorney general, wey dey attend cabinet, to one of di biggest jobs for cabinet.

Ben Wallace - Defence Secretary

Ben Wallace remain defence secretary, di post wey im don hold since July 2019.

Im don earn praise for im response to di Ukraine crisis.

Dem bin first consider am di favourite to succeed Boris Johnson.

Im shock many pipo as e decide not to stand for di leadership contest and back Truss afta she reach di last round.

Di former ski instructor, Wallace, train for Sandhurst before e join di Scots Guards as a platoon commander.

Nadhim Zahawi - Chancellor of di Duchy of Lancaster

Dem name Nadhim Zahawi chancellor of di Duchy of Lancaster - responsible for running di Cabinet Office.

Dis na di department wey dey support di prime minister.

Im don be chancellor of di exchequer for two months afta dem promote am wen Rishi Sunak resign.

Before dat time, im be education secretary.

Zahawi, wey go also be equalities minister, first enter di cabinet for September 2021.

Dat na afta im oversee di rollout of di coronavirus vaccine.

Simon Clarke - Housing and communities secretary

Simon Clarke get promotion to di full cabinet as levelling up, housing and communities secretary.

She take ova from Greg Clark, wey replace Michael Gove for July.

Na previously chief secretary to di Treasury but choose to support Liz Truss for di leadership instead of im former boss Rishi Sunak.

Jacob Rees-Mogg - Business secretary

Dem give Jacob Rees-Mogg di role of business secretary afta im first be one of di first MPs to back Liz Truss for di leadership.

Rees-Mogg na one of di Conservative Party highest profile Brexiteers.

Im previously dey for di cabinet as Brexit opportunities and government efficiency minister.

And before dat im be attending member as Commons leader.

Kemi Badenoch - International trade secretary

Kemi Badenoch enta di cabinet as international trade secretary.

Badenoch surprise many pipo to reach di last four for di leadership contest.

Di British wit Nigerian roots na former minister for di Department for Levelling Up, Housing and Communities and equalities minister.

She no endorse any of her rivals for di leadership race, and go replace Anne-Marie Trevelyan.

Chloe Smith - Pensions secretary

Chloe Smith dey replace new Health Secretary Thérèse Coffey as work and pensions secretary.

She don be minister for di department since September 2021 and na early supporter of Liz Truss leadership bid.

Alok Sharma - President for COP26

Alok Sharma remain as president for COP26, di 26th United Nations Climate Change Conference, working inside di Cabinet Office.

Di former business secretary and international development secretary no reveal who im dey support for di leadership race.

Di qualified chartered accountant work for accountancy and professional service firm Deloitte before im spend 16 years for banking.

Brandon Lewis - Justice secretary

Brandon Lewis dey di cabinet for a third time, dis time for di role of justice secretary, dey replace Dominic Raab.

Di former Northern Ireland secretary, wey resign for July, initially back Nadhim Zahawi for di leadership.

But im endorse Liz Truss at di start of August.

Im previously be party chairman and minister without portfolio for Theresa May cabinet.

And oga Lewis serve as a minister in plenti departments under May, David Cameron, Boris Johnson.

Kit Malthouse - Education secretary

Kit Malthouse replace new Foreign Secretary James Cleverly as education secretary.

Di former chancellor of di Duchy of Lancaster, responsible for running di Cabinet Office, no tok who im support for di leadership race.

Malthouse come to di fore in di Brexit debate.

Na wen dem put im name for one so-called compromise plan to replace Theresa May proposed Northern Ireland backstop wit "alternative arrangements".

Ranil Jayawardena - Environment secretary

Ranil Jayawardena become environment secretary, as im take ova from George Eustice.

Im previously be minister for di international trade department, dey work for Liz Truss before she become foreign secretary.

And im be early supporter of her leadership bid.

Anne-Marie Trevelyan - Transport secretary

Anne-Marie Trevelyan don become transport secretary, to replace Grant Shapps.

She don previously be international trade secretary, dey replace Liz Truss for di role for 2021.

And before dat im don be international development secretary but lose her place for di cabinet wen dem scrap di department.

Chris Heaton-Harris - Northern Ireland secretary

Chris Heaton-Harris gbab promotion to di cabinet as Northern Ireland secretary.

Im dey replace Shailesh Vara wey bin just take on di role for July.

Di former chief whip, wey fit attend cabinet for dat role, im no tok who im dey support for di leadership race.

Im previously be transport and Foreign Office minister.

Before im become politician, Heaton-Harris run im family wholesale fruit and vegetable business for New Covent Garden Market.

Alister Jack - Secretary of state for Scotland

Alister Jack remain secretary of state for Scotland for Liz Truss first cabinet.

Dis na role im don hold since Boris Johnson become prime minister for 2019.

Di former government whip no reveal who im support for di leadership contest.

Robert Buckland - Secretary of state for Wales

Robert Buckland remain secretary of state for Wales, dey continue in in role im take afta Simon Hart resignation for July.

Im don previously dey for di cabinet, as justice secretary, between July 2019 and September 2021 and na former solicitor general.

Penny Mordaunt - Leader of di House of Commons

Penny Mordaunt return to di cabinet as leader of di House of Commons.

E go dey responsible for delivery of di goment legislative programme, dey replace Mark Spencer.

She endorse Liz Truss afta nearly beating her into di final two of di Conservative leadership race.

Lord True - Leader of di House of Lords,

Lord True na di leader of di House of Lords, wey dey responsible for delivery of di goment legislative programme for di Upper House.

One former Cabinet Office minister, im replace Baroness Evans wey don hold di position since 2016.

Michelle Donelan - Culture secretary

Michelle Donelan get appointment as culture secretary, giving her a second chance to make her mark for cabinet.

E follow her resignation two days into di job of education secretary for July.

Di former higher and further education minister replace Nadine Dorries.

Na afta she backed Liz Truss afta initially support her former boss Nadhim Zahawi and then Penny Mordaunt for di leadership race.

Jake Berry - Minister without portfolio

Jake Berry join di cabinet as minister without portfolio.

And na also Conservative party chairman, responsible for party administration and campaign, im replace Andrew Stephenson.

Before now, im be Northern Powerhouse minister but comot goment for one reshuffle for 2020.

And now chairs di Northern Research Group, dey represent many of di Tory MPs wey don win di seats for traditional Labour heartlands for 2019.

Wendy Morton - Chief whip

Wendy Morton get appointment as chief whip.

Im dey responsible for party discipline and ensure Conservative MPs vote along party lines, and go attend cabinet.

Di former assistant whip backed Liz Truss for di start of di leadership contest and replace Chris Heaton-Harris for di role.

Morton, wey don be transport and Foreign Office minister, say her interests include walking, cookery, art deco and ceramics.

Chris Philp

Chris Philp get appointment as chief secretary to di Treasury, attending cabinet, and take ova from new Levelling Up Secretary Simon Clarke.

Di former digital minister initially back Sajid Javid for di leadership race but endorse Liz Truss for July.

Michael Ellis - Chief legal adviser to di government

Michael Ellis get appointment as attorney general - di chief legal adviser to di government - and fit attend cabinet.

Im replace new Home Secretary Suella Braverman, afta im previously fille in for her wen she go on maternity leave for 2021.

One former Cabinet Office minister and paymaster general, Ellis support Liz Truss rival Rishi Sunak for di Conservative leadership race.

Edward Argar - Paymaster general and Cabinet Office minister

Edward Argar go attend cabinet afta dem name am paymaster general and Cabinet Office minister.

Argar dey replace new Attorney General Michael Ellis.

Di former health minister, wey resign for July, support Liz Truss for di leadership race.

Dat na afta im initially back ex-Health Secretary Sajid Javid.

Before e enta parliament im work for management consultancy and communications for different companies.

E include outsourcing firm Serco and be city councillor for Westminster.

Vicky Ford - Development minister for di Foreign Office

Vicky Ford don become development minister for di Foreign Office and go attend cabinet.

Di former MEP and South Cambridgeshire local councillor be early supporter of Liz Truss for di leadership race.

Before e enta politics she work as managing director of one international bank.

And im dey involved in raising money for infrastructure projects in Europe, di Middle East and Africa.

Tom Tugendhat - Security minister for di Home Office

Tom Tugendhat go attend cabinet as security minister for di Home Office.

Im reach di final five for di Conservative leadership race before endorsing Liz Truss.

Di former Territorial Army officer serve for Iraq and Afghanistan.

Im don be chairman of di Foreign Affairs Select Committee since 2017 but dis na im first ministerial post.

James Heappey - Minister for di armed forces and veterans

James Heappey na minister for di armed forces and veterans for di Ministry of Defence.

Im don already be defence minister but go now attend cabinet afta im back Liz Truss for di leadership race.

Di former soldier spend 10 years for di Army, serve for Afghanistan, Iraq and Northern Ireland, before e enta politics.

Graham Stuart - Climate minister for di business department

Graham Stuart become climate minister for di business department and go also attend cabinet.

Di former Foreign Office and international trade minister, wey don also be government whip, support Liz Truss for di leadership race.

Im describe himself as a keen cyclist and say im interests include football, economics, motorcycling and punk rock.