Achimota School: Attorney-General advise Achimota school say dem for admit dreadlock students pending appeal

Attorney-General of Ghana, Godfred Dame advise Achimota School to admit two dreadlock students whilst dem dey work on appeal.

Dis be after e advise against stay of execution wey Achimota School Board apply for to stop de students from enrolling.

Lawyers of de students file case against Achimota School after authorities deny de students admission until dem cut dema dreads.

On Monday, High Court for Accra order Achimota School to admit de two students who dem deny admission sake of dema dreadlocks afta Parents of de students challenge de decision of de school who refuse to grant dem admission.

But Attorney-General explain say de stay of execution to prevent de students from schooling pending de appeal no be necessary.

He explain say govment be more interested in de students getting education.

According to Godfred Dame, "de President go be concerned about any action which go prevent dem Rastafarian students from going to school."

"So if students for go school, de school for open dema doors to dem" he talk Accra-based Joy Fm.

Achimota School Board despite dema initial action, withdraw de stay of execution following advise of de Attorney General.

Mr Dame advise parents of de two dreadlock students say dem go fit go de school to enroll for classes while de appeal case dey go on for r court.

Meanwhile, parents of dreadlock students give indication say dem make ready to go de school to register de boys for academic work.

Achimota governing board appeal court ruling

De Governing Board of Achimota School send strong signal say dem go appeal de court decision on admission of dreadlocked students.

Dem make an clear say as a board dem dey disagree plus de decision of de court so dem notify dema lawyers.

De board of governors make dis known inside statement wey dem release.

Justice Gifty Addo of de Human Rights Division of High Court who preside over de case in her ruling talk say de school no fit limit de fundamental human rights of de two students sake of dema hair.

De decision of de school in March spark debate among Ghanaians who either agree or disagree plus decision to allow or disallow de student from schooling plus dreads.

De lawyers in suing Achimota School den Ghana Education Service pray de court "declare say failure and or refusal of de 1st Respondent (Achimota School Board of Governors) to admit or enroll de Applicant on de basis of Rastafarian religious inclination, beliefs den culture which dem dey display through keeping of Rasta hair be violation of en fundamental human rights and freedoms which de 1992 constitution dey guarantee, particularly Articles 12(1), 23, 21(1)(b)(c)".

De applicants also request for compensation sake of de "inconvenience, embarrassment, waste of time, den violation of fundamental human rights and freedoms".