School reopening latest update: South Africa do U-turn close all public schools sake of coronavirus stats

Goment schools for South Africa go close down for four weeks from Monday as part of measures to take fight di increase in di number of coronavirus cases for di kontri.

President Cyril Ramaphosa tok say e dey important to make sure say schools no become sites of transmission at dis kain time wey coronavirus cases for South Africa dey increase at one of di fastest rate for di world.

Older students for primary and secondary schools bin return to schools on 6 July.

"Taking into account di views of di different stakeholders and expert bodies, cabinet don decide say all that all public schools go take a break for di next four weeks," President Ramaphosa tok.

He tok say dem go extend di current academic year till di end of 2020 sake of di disruptions wey di pandemic cause.

"We don take deliberate approach to close all schools during dis period wey we dey expect say di cases of infections go increase for di kontri," he tok.

Di president also announce $30bn (£24bn)package to fund health services and help pipo wey dey in greatest need.

South Africa bin reopen schools for June 1, 2020 even as parents no gree support di move.

Di kontri as at July 23, 2020 don record ova 408,000 cases of coronavirus and dis number na one of di highest number of recorded cases for di world and di highest for Africa.