Ghana vs Nigeria match: In fotos, Black stars of Ghana arrive Kumasi as Nigeria Super Eagles intensify training ahead of FIFA 2022 playoff

Di Black Stars of Ghana don arrive Kumasi ahead of dia 2022 FIFA World Cup playoffs against Nigeria on Friday.

Di players and dia officials meet fans and tori pipo on dia arrival for di venue.

Foto of di team arrival wey di Ghana Football Association post for social media show first timers Denis Odoi, Montari Kamaheni, Elisha Owusu, and Dennis Korsah for di squad.

Super eagles intensify training

Meanwhile, Super eagles squad for di match don almost complete wit twenty-one players for dia Abuja camp and di arrival of Nigeria top striker, Victor Osimhen.

Ahead of di Fifa World Cup qualifier between Ghana and Nigeria, Super Eagles arrive di Moshood Abiola National Stadium for dia first training session.

Nigeria National team coach Augustin Eguavoen don drop Super eagles first choice goalkeeper, Maduka Okoye sake of say e no well.

Enyimba International goalkeeper, John Noble don get invitation to replace Okoye.

Ghana vs Nigeria head to head

Di last time dis two kontris meet, na for 2011 but games between di two go way back as 1950.

Ghana and Nigeria don meet 56 times across all competitions. Di Black Stars don win 25 while di Super Eagles don win 12 and di oda19 games end for draw.

Playing Ghana away from home never really favour Nigeria as dem don lose 16 times wenever dia West African rival host dem. Six end for draw.

Na only one time Nigeria win out of di 23 times wey Ghana don host.