Wetin happun to Syria 'miracle' earthquake baby?

Wen dem see Afraa for di rubble of one collapsed building for Syria, her umbilical cord still dey attached to her mother, wey die just afta she give birth.

Video of di baby miraculous dem rescue from di earthquake for February bin captivate di world. Since then she don make remarkable recovery.

Today, Afraa be six months old – she be typical happy, healthy baby.

Her aunt and uncle dey raise her alongside dia seven children for di Syrian town of Jindayris, wey no dey far from di Turkish border.

"She still dey very young but she remind me of her papa and her sister Nawara, especially her smile. Dem die for di earthquake too," her uncle, Khalil al-Sawadi tok as e dey rock di smiling baby girl for her swing. "She no dey give us trouble at all."

On 6 February, just afta di die deadly earthquake wey hit Jindayris, Afraa mama bin go into labour and she born under di rubble of her house. She die before rescuers see dem.

Baby Afraa na di only member of her immediate family wey survive - her father, Abu Rudaina, and her four siblings all die too.

"We see say Abu Rudaina house don collapse," Khalil tok. "My wife begin dey shout: 'My brother, my brother.'"

Khalil remember well-well di moment e comot Afraa from under di rubble: "Di roof bin fall on top dem. Someone call me say dem see one woman body. As soon as I reach there, I begin dey dig, den I hear one voice. Na baby Afraa wey still dey attached to her mother. We dey determined to save her, we know say she go be di only memory of her family wey remain."

Dramatic video of how dem take rescue her bin go viral on social media. Dem carry her go hospital and di hospital bin name her Aya, wey mean miracle for Arabic.

Di doctor wey bin look afta her tok say she bin get bumps and bruises and dey barely breathe wen dem rush her come hospital.

Six months afta, those injuries don clear. "Immediately afta di earthquake she bin get some chest problems sake of di dust from di rubble, but now her health dey great," Khalil tok. "I carry her go see doctor for check-up and now her health na 100%."

But di past six months bin dey tough. Wen Afraa bin dey hospital, thousands of pipo around di world bin offer to adopt her, so Khalil and im wife Hala gatz prove say dem really relate before dem gree make dem take care of her. "I feel like say dem no wan give us Afraa,” e tok

Hala gatz do DNA test. "In di beginning, na just blood test, den about a week later dem call us again. Dem take anoda sample of blood and hair from my wife. E take almost 10 days before dem get back to us."

Plenty interest bin dey Afraa tori wey make Khalil and im family bin worry say as dem dey wait for do DNA results, pesin fit try kidnap her.

Dem spend so much time for hospital and dem dey extra careful. "Both di civil and military police bin help us protect her," e tok. "Dem plenty. Dem stay for di room wey dey next to Afraa and dem watch her day and night."

Wen di DNA results comot, dem confam say Hala na blood relative – di sister of Afraa father - and dem discharge di little girl from hospital.

One of di first tins Khalil and Hala do na to give her a new name – dem name her Afraa afta her mother.

"She be one of my children now," Khalil tok. "I no fit dey away from her for too long.

"Wen she grow up, I go tell her wetin happun and show her di fotos of her mother, father and her siblings. We bury dem di next day for one nearby village dem dey call Hajj Iskandar, wia di Civil Defence bin dig mass graves."

Hala bin dey pregnant at di same time as Afraa mama and three days afta dem born Afraa, Hala also give birth to one baby girl. Dem call her Ataa afta anoda auntie wey die for di earthquake.

But dia house for Jindayris bin scata well-well and dem no fit live dia again. "E get big cracks and e no dey safe," Khalil tok.

"I lost my home and my car, e be like say I go back square one. I no even fit afford to send my pikin dem go school."

Dem bin live for one tent for one camp for two months wia life bin dey "extremely difficult, e dey very hot and we get two babies to take care of".

Di family finally manage to see house to rent wia dem dey live now, but dem dey fear say dem no go fit stay dia for long. "E dey very expensive and I no know if we go fit keep am much longer as di owner need am," Khalil tok.

Pipo don offer to help dem move go UAE or UK but e don turn dem down. "Honestly, I bin dey worry say [if I go abroad] dem fit take Afraa away from us."

E remind us say "pipo dey wey dey live under worse conditions for Jindayris".

Im hometown na one of di worst-hit by di earthquake and thousands of oda families see themselves for similar predicament.

In all, more dan 50,000 pipo die for Syria and Turkey - at least 4,500 for north-west Syria, wia estimated 50,000 families bin also dey displaced, according to di UN.

To deliver aid to di four million pipo wey dey live for dis area of Syria wia rebel hold dey extremely difficult, wia most of di residents don dey already displaced by di kontri 12-year war.