Trump video wey show Barack Obama and wife as monkey generate backlash

US President Donald Trump don tok say im "no see" di part of di social media video wey show racist clip wey present Barack and Michelle Obama as apes.

Di clip - wey dem use di song 'The Lion Sleeps Tonight' - dey for di end of di 62-second video im share wey contain claims about voter fraud for di 2020 presidential election. Dem later remove di video.

On Friday, Trump tell tori pipo say, "I no make any mistake" wen dem bin ask am weda im go apologise.

Im add say im bin only see di beginning of di video bifor im staff member post am and im bin no know say e get wetin represent di Obamas.

Republican Senator Tim Scott - wey be black - describe am as "di most racist tin wey I don see out of dis White House".

Di White House bin initially defend di clip as "internet meme video" and tell critics to "stop di fake outrage".

But afta serious backlash, including from several Republican senators, dem remove di post from Trump Truth Social account and one White House official say na one staff bin post am by "mistake".

Di clip - wey bin recall racist caricature wey dey also compare black pipo to monkey - be like say dem take am from one X post wey di conservative meme creator Xerias bin share in October.

Di video also represent several oda high-profile Democrats as animals, including New York Representative Alexandria Ocasio-Cortez, New York City Mayor Zohran Mamdani and former Secretary of State Hillary Clinton.

Di video also show Trump predecessor for di White House, Joe Biden, as ape wey dey chop banana.

Di Obamas neva comment on di video yet.

Di video na one of odas wey dem bin post to Trump Truth Social account overnight.

"I dey look at a lot of thousands of tins," di president tok wen im dey aboard Air Force One on Friday, im add say afta im watch only part of di video im bin "give am to di pipo wey dey generally, look di whole tin".

Im say im like di message for di video on voter fraud, but like say im staff bin look di whole tin, "maybe dem for get di sense to take am down".

"We take am down as soon as we find out about am," im add.

Some criticism bin come from within Trump own party.

Senator Scott, one South Carolina Republican wey be Trump ally, bin post say im bin dey "pray say na fake becos na di most racist tin I don seen out of dis White House".

"Make di president remove am," im add.

Anoda Republican, New York representative Mike Lawler, bin call di post "wrong and incredibly offensive - weda intentional or na mistake" and say "make dem delete am sharp-sharp plus make dem apologise."

Di criticism bin continue even afta dem bring down di post.

John Curtis, one Republican Senator from Utah, post on im social media say di video dey "blatantly racist and inexcusable".

"Dem no suppose post am or leave am published for so long," im write.

According to CBS, di BBC US partner, Florida representative Byron Donalds - wey be longtime supporter of Trump wey dey run for govnor - call White House afta dem post di video and dem tok say na one staff "let di president down".

Di BBC don contact di White House for clarification on how many pipo get access to di president account and wetin di approval process for posts be like.

For statement wey dem bin send to BBC earlier dat day, White House Press Secretary Karoline Leavitt bin say di clip na from "one internet meme video wey show President Trump as di King of di Jungle and Democrats as characters from di Lion King".

"Please stop di fake outrage and report on sometin today wey actually mata to di American public," she add.

Bifor dem remove am, Derrick Johnson, di president of di National Association for di Advancement of Colored People, or NAACP, say di video dey "disgusting and utterly despicable" and accuse Trump say e dey attempt to distract di public from di Epstein case and di "rapidly failing economy."

Ben Rhodes, one former deputy national security adviser for strategic communications for di Obama White House, say: "Make e haunt Trump and im racist followers, di future Americans go embrace di Obamas as beloved figures as dem go study am as stain on our kontri."

For one short post of im own, Illinois Governor JB Pritzker tok say "Donald Trump na racist".

"Disgusting behaviour by di president," di office of California Govnor Gavin Newsom write on X. "Every single Republican must denounce dis. Now."

House Minority Leader Hakeem Jeffries - wey bin accuse Trump of racism last year afta im bin share one AI-image wey represent Jeffries wit moustache and sombrero - respond to di recent video by calling Trump "vile, unhinged and malignant bottom feeder".

"Make evri single Republican immediately denounce Donald Trump disgusting bigotry," im add.

Dem bin add di clip of di Obamas for di end of di one minute-long video wey bin include claims about voting conspiracy for Michigan for di 2020 presidential election. Dem bin deny di claims as part of Dominion Voting System successful civil legal actions against some media companies.

Trump also get long history of criticising and attacking Obama.

Before im first term as president, Trump bin regularly make false claims say dem bin born Obama for Kenya and diafore in no qualify to be president.

Im later acknowledge say dem born Obama for di US.