Legendary Ghanaian musician Daddy Lumba make im final journey home despite drama ova who be im 'legal wife' and oda controversies

Afta plenty controversy afta di death of legendary Ghanaian highlife musician Daddy Lumba for July, one side of di family don finally hold im funeral for Kumasi.

Dis be afta di High court for Accra clear di way for di funeral to happun despite one injunction application by one side of di family.

Di side of di family wey di late musician sister Akosua Brempomaa dey lead, bin file plenti court cases against di funeral.

Daddy Lumba first wife - Akosua Serwaa wey base for Germany for many years also file case for court say she be di only surviving wife of di musician.

She argue say Daddy Lumba marry her under civil law – wey mean say unless court dissolve di marriage, di husband no fit marry any oda woman, wey go be "legally accepted".

But afta hearing di case and di evidence and witness statements, di High Court for Kumasi rule say Akosua Serwaa no fit prove beyond doubt say she and di late musician get civil marriage.

Di judge say documents wey dem present as evidence to di court to support dia case say she and Daddy Lumba get civil marriage for Germany no be complete.

Di judge Her Ladyship Justice Dorinda Smith Arthur tok in her ruling say, "Di evidence dem submit fall short of section 136 and 161 of di law wey dey required say di plaintiff gatz submit di original marriage certificate from dia marriage for Biornheim marriage registry togeda wit certification from di Ghana embassy for Germany."

Di court also rule say under di evidence act, di plaintiff gatz to present recognised German civil marriage expert to testify, but dem no do am.

According to dia family head - Abusuapanin Kofi Owusu wey testify for court, di first wife many years ago tok say she no wan continue wit di marriage wit Daddy Lumba so dem dissolve di marriage.

But di court say dem no find any proof wey show say di customary marriage between di two dey dissolved.

Di court describe di evidence as "inconsistent and unreliable".

Di ruling by di court mean say Akosua Serwaa - di first wife (wit three children wit di musician) and Odo Broni di second wife (wit six children wit di musician) both be legally recognised as surviving wives of di late highlife musician.

Lawyers for di first wife file appeal against di High Court ruling; di court no hear dat appeal yet, but di oda side of di family continue wit preparations for di 13 December funeral, bifor dem file injunction against di process.

Di controversy continue for public and for court premises weneva dem call di case – as supporters of both wives of di musician dey clash.

Sometimes, police dey use dia van to escort di family head and oda witnesses wey testify for court for di case.

Di late musician sister Akosua Brempomaa and her side also maintain say dem no like how dem dey rush to do di funeral of her brother.

She ask di High Court for Accra to put injunction for di funeral and stop di funeral home, say make dem no release di musician bodi to anybodi unless di case dey ova.

Her side of di family maintain say dem go do di funeral of di musician for March 2026 wen evritin don settle and di children of di musician wey dey outside di kontri finally arrive.

Di High Court on Friday 12 December grant di injunction wey halt di funeral preparations briefly.

But under one condition – say di plaintiff go pay GHc 2m ($175k) to di court by 2pm as deposit for any cost wey di oda side of di family go suffer if di appeal succeed.

Di court later lift di injunction hours later, afta di plaintiff fail to deposit di Ghc 2m ($175k) for di court, wey now pave di way for di funeral to continue on13 December.

Late Thursday night, di funeral home release di bodi of di 60-year-old Daddy Lumba for di funeral.

Di side of di family wey dey fight di mata for court say dem no go attend di funeral wey dem no go participate for any of di rites.

Reaction to di plenti drama

Fans of di late musician and oda celebrities and entertainment pundits say di way di family handle di mata dey embarrassing to di legacy of di musician.

Some say dis long battle take di shine away from di life di musician bin live.

One popular spiritual man Prophet Kwabena Boakye Asiamah aka Ajagurajah tok say "di family drama afta Lumba die dey show say e be successful pesin wey live impactful life".

"You see di way Lumba name always dey in di news since e die, e mean say e leave behind some property dat be why dem dey fight since," e tok.

Samuel Otoo write for Facebook say "no proper elders dey di Lumba family wey dem no love am or im legacy".

"Di family embarrass diasef since e die, wey dem drag di legacy of di man wey produce music across three decades."

E add say "families dey dis kontri wey get plenti drama pass dis one, but dia elders chook mouth for dia case to settle tins quietly but no be for dis Lumba case".

"Since di court case begin, evri detail of di late musician private life dey out now, like dem carry all dia secrets go market square, dis be sad," Samuel Otoo add.

Oda pipo share di same view.

Di govment go assist di family for di funeral sake of di late musician be legend wey dey acknowledged as one of di best highlife musicians di kontri eva produce.

Days afta im death, ex-presidents Nana Akufo-Addo, John Agyekum Kufour and di office of di current President John Mahama all visit im house to condole wit di family.

Oda top govment officials, celebrities and popular pipo also visit dia home to commiserate wit dem.

Funeral happun for Kumasi sports stadium

Di controversial funeral happun for di Baba Yara Stadium for Kumasi wit heavy police and security presence.

Fans and sympathisers of di late musician gada dia since Friday night to witness di funeral of dia legend.

Daddy Lumba die on 26 July 2025, according to statement by di family lawyer.

"Daddy Lumba die afta short illness. Daddy Lumba be more dan musician, e be cultural icon as im music bin touch countless lives," di statement wey lawyer Fati Ali Yallah don sign tok.

Di family add say "im soulful voice provide soundtrack to our love stories and im poignant lyrics bin capture di poetry of our struggles, dreams and resilience".

Fotos and from di funeral

Profile of Daddy Lumba

Di legendary artiste don get music career wey span ova 30 years.

Pipo sabi am as "di most influential musician for di history of Ghana," according to tori on top im official website.

Many top musicians for Ghana today consider am as dia inspiration for di highlife music genre. Artiste like Ofori Amponsah, Kuami Eugene, Kidi, Oheneba Kissi and odas.

Dem born Daddy Lumba on 29 September 1964 for Nsuta for di Ashanti region.

For di early 1980s wia im music career don begin wen im form di Nkwanta Wesley singers band wey become popular for di region.

According to info on top im website, im get di name Lumba afta im compose one song wit di title 'Lumba Lumba' wey im dedicate am to di freedom fighters for South Africa dat time.

Na so di song don become popular wey im get di nickname 'Daddy Lumba'.

Daddy Lumba bin travel go Germany afta im studies, for dia e meet anoda Ghanaian musician Nana Acheampong, and dem form anoda group 'Lumba Brothers band for dia.

Di group release dia first album 'Yee ye aka akwantuom' for di year 1986.

Di two don split and Lumba launch im solo career and release debut solo album "Obi Ate Me so Buo" for 1990.

Di legendary highlife artiste don release 33 albums for im career wit many popular songs.

Some of im popular albums na Sika Sem, Aben Wo Ha, Wo Ho Kyere, Awosoo, Give Peace a Chance, and Ahenfo Kyiniye.

Im latest project na Ofon Na Edi Asem Fo, wey e release for December 2022.

Daddy Lumba apart from im own career don mentor and train odas like Felix Owusu, Afia Ampofowaa, Kwabena Sunmwa, Ofori Amponsah, Ateaa Tina and odas.

Na two wives and 11 children survive am.