Why PDP dey insist say dem must do dia National convention?

Nigeria main opposition party, di Peoples Democratic Party (PDP) say dem dey go ahead wit di Elective National Convention.

Dis dey come afta court bin stop di plan for di National convention for October 2025.

Na Justice James Omotosho of di Federal High Court for Abuja bin deliver di judgement say di planned 2025 National Convention of di PDP no go hold until dem comply wit di statutory requirements of di PDP, di Constitution and di Electoral Act.

How e take happun be say Abraham Ammah, Austine Nwachukwu and George Turner carry mata go court say PDP breach di party constitution for dia plan to hold di convention.

Dem sue nine defendants including di Independent National Electoral Commission (Inec), and oda officers of PDP.

Na dia di court come rule say make PDP stop dia planned convention.

Meanwhile, di party don arrange 15 and 16 November, 2025 for di convention to hold wia dem go elect new national executives for di party.

Tpri be say all preparations don set for di Lekan Salami Stadium for southwest Ibadan, Oyo state wia di convention go hold.

Seats don set, tags don set, podium don set and securiti dey on standby as different posters bin fill di venue of di convention.

But wetin happun to di court order wey make PDP no do dia National Convention sake of some issues wey dem neva resolve?

'We dey go ahead'

BBC News Pidgin reach out to di PDP on how di national convention go take waka and why e dey important for dem to hold di convention despite di court order.

Ibrahim Abdullahi wey be di Deputy National Publicity Secretary of di PDP say di party dey go ahead wit di national Convention.

E say di party don witness series of party leadership wey be always through consensus, but di convention go help dem get leadership replacement.

"We dey get leadership replacement, dem go take ova to manage di affairs of di PDP. Di Convention go dey successfull."

"We no go get any violence or anger, e go be di best decision for di PDP. We dey united regardless of di efforts by some pipo wey be paid agents from di ruling party."

Di Deputy National Publicity Secretary of di PDP say na di ruling party dey try put scatta scatta into dia affairs.

E add say dem don sort evri issues wey di party dey face, including di court order wia e say dem also get court injunction wey give dem order to go ahead wit dia convention as planned.

"Opposition party dey try so hard to make sure we no get am right but we no go gree, we don resolve say we go get am right and we don put evri legal angle in place including di legal angle, we don sort am."

"If any injunction dey wey no want make we do di convention, anoda counter injunction dey from court wey permit us to go ahead, we dey go ahead."

PDP Elective National Convention dey expect about 3,000 delegates from Nigeria 36 states and di Federal Capital Territory (FCT), along wit party leaders, stakeholders, and international observers, including members of di Diplomatic Corps, according to di party.

Na for dis convention dem go elect di new National Chairman of di PDP, and oda key national officers.

According to Debo Ologunagba, di National Publicity Secretary of PDP, e say make dem no believe any tok say dem dey stop di convention.

"We dey aware of di plots by di APC to scatta di opposition and impose one-party state for di kontri, design wey we go lawfully reject."

E add say supporters and party leaders don begin dey arrive for Ibadan.

'I no support am' Bukola Saraki

Meanwhile, one of di strong members of PDP, Bukola Saraki, say e no support di National Convention.

E tok dis one wen e bin di PDP BoT Reconciliation Team visit am.

Saraki say di solution no be convention but make dem setup caretaker committee wey go manage di affairs of di party.

"My advice to di BOT team na say di only solution available to us now na for di party to set up Caretaker Committee to drive di affairs of di party for di time being. Dis gatz come in di next two days."

Saraki say na through di caretaker committee go make di party stable and also give confidence to party members wey wan contest elections on di PDP platform.

"For di present situation, no serious politician wit electoral ambition go seek to contest on di platform of di PDP, not knowing weda im nomination go dey valid or declared null and void."

Di former Kwara state govnor say di PDP planned National Convention for Ibadan go 'only put more fuel to di present crisis.'

"Diafore going ahead wit di Convention as scheduled na waste of efforts. E no get my support," Saraki tok for im statement.