Uefa Champions League results and table: Liverpool finally beat Real Madrid afta 15 years

Arne Slot continue im fine run as Liverpool's new manager after di Reds beat Real Madrid 2-0 at Anfield to maintain dia 100 percent start for di 2024/2025 Champions League season.

Liverpool get maximum 15 points from dia five matches so far to remain on top of di league stage of di new Champions League format.

Second half goals from Alexis Mac Allister and Cody Gakpo na im give Slot's men di victory for di match wia superstars Kylian Mbappe and Mohammed Salah both miss penalties.

Di last time Liverpool win Real Madrid na in March 2009 wen dem coast to a 4-0 win to reach di quarter-finals of di Champions League.

Di Reds, however, fail to win any of di last eight matches between di two - a winless run stretching across 15 years. But dem don put all of dat to rest wit dis ogbonge win.

For di oda results on Wednesday night, Aston Villa and Juventus play 0-0 draw for di Villa Park, wit di referee ruling off wetin for be a die-minute goal from Villa sake of a foul on di Juve keeper.

UEFA Champions League matchday five results

UEFA Champions League Table

Position 1 - 8 : go automatically enta next round

Position 9 - 24 : go go play Play-off

Wen di 2024/25 Champions League knockout phase dey start?

Knockout phase play-offs: 11/12 & 18/19 February 2025

Round of 16: 4/5 & 11/12 March 2025

Quarter-finals: 8/9 & 15/16 April 2025

Semi-finals: 29/30 April & 6/7 May 2025

Final: 31 May 2025

Wia dem go play di Champions League final for 2025?

Di 2024/25 Champions League season final go take place for di Allianz Arena, home of Bayern Munich.

Dis go be di first time since 2012 dem go play am dia.

Di 2024/25 winners also go gain a place for di league phase of di 2025/26 Uefa Champions League, if dem no qualify through dia domestic competition.

Di new format of di Uefa Champions League bin start on Tuesday, 17 September, 2024 and e dey very different format to wetin di UCL wey football lovers across di world bin dey used to.

Dis 2024/2025 season, instead of group stages, every team go play eightt matches in a league format - four home and four away.

Afta dat, di first eight for di league table go qualify for round of 16 and position 9 t0 24 go enta play-off to determine who go also enta round of 16, while di odas don comot for di competition.