Which strong man still dey PDP and who dey out

Di number of govnors for di Peoples Democratic Party (PDP) don go down to eight, afta Enugu state govnor Peter Mbah and Bayelsa state govnor Douye Diri recently announce dia defection from di party.

Di Enugu state govnor bin join di ruling All Progressives Congress (APC), but di Bayelsa govnor no tok announce di party im dey go next.

Dis latest defections don further weaken di opposition wey bin dey control 12 states afta di 2023 general elections.

Wit dis recent trend of defections, di APC now dey control 24 states out of di 36 states for di kontri, while PDP now hold eight states.

Labour Party, All Progressives Grand Alliance and New Nigeria Peoples Party dey govern one state each.

On Tuesday, 14 October, Enugu state govnor Peter Mbah bin announce im defection go di APC.

For one state broadcast, Mbah say di reason for im defection na to connect di South-eastern state to di central govment.

Di PDP govnor defect go di ruling party wit members of di National Assembly, State House of Assembly members, councillors, chairmen of councils plus oda strong politicians for di state.

Leadership of di APC arrange one grand reception for Enugu to welcome di govnor.

E no even reach 24 hours, Bayelsa State govnor, Senator Douye Diri, bin rest speculations around im rumoured defection from di PDP as e officially announce im resignation from di party for wetin e describe as "obvious reasons."

On Wednesday, 15 October, for one state executive meeting, e announce say im take di decision afta extensive consultation wit leaders of di state.

Govnor Diri say e dey resign for "obvious reasons " and e no go resign alone as e go wit di 23 members of di Bayelsa State House of Assembly.

"So, today, I don formally resign from di PDP for very obvious reasons," e tok.

Dis fresh wave of defections bin come just days afta di Chairman of di PDP Governors' Forum and Bauchi State governor, Bala Mohammed, express concern on top di growing number of governors and senior party figures wey dey cross go di APC.

Which govnor don comot PDP and which one still dey?

As at Wednesday, 15 October, di govnors wey dem elect under di umbrella of di PDP and wey still dey di party include:

Di ones wey dem elect under PDP wey don comot go join di APC include:

National and House of Representatives members wey don port from PDP since Tinubu bicom president

Some of di senators and house of representatives members wey dia defection dey widely announced include:

Federal representatives from Delta publicly defect for April, following di state govnor Sheriff Oborevwori defection, di immediate past govnor, Ifeanyi Okowa plus all members of di PDP for di state bin follow for di defection.

State Assemblies / Mass legislative defections

Why all dis govnors dey comot from PDP?

Most of di govnors and oda politicians wey don resign from di party wey bring dem come power go di ruling party dey often cite di need to align wit di central govment as di reason.

Di latest govnor to defect, Enugu state Peter Mbah say di decision bin no come easy,.

E say PDP and di Southeast bin dey loyal to di PDP for nearly 30 years, as dem give di party dia total support, carry di party for dia shoulders and make plenty sacrifices, but even at dat, di party no reason dem.

"Wen dem dey take critical national decisions, dem dey most time ignore our voices."

E add say, "di PDP no longer represented a viable vehicle for our aspirations. To secure our future, we gatz align wit platform wey value and reinforces our vision."

Also im counterpart, govnor Diri of Bayelsa state wey recently resign tok say di decision na for "obvious reason".

Wetin these defections mean for Nigeria democracy?

Former govnor of Bayelsa State and senator wey dey Bayelsa West for di National Assembly Sen. Seriake Dickson reaffirm im commitment to PDP, and say di Governors wey dey defect dey make a mockery of democracy.

Dickson tok dis one for di National Assembly complex Abuja as e react to governor Diri resignation from di PDP.

"E dey sad say instead of fixing di problems, dem allow di crisis fester and now dem dey bail out. E dey make Nigeria look small, e dey ridicule our democracy, and endanger multiparty politics. Wetin we dey witness na political class suicide." E tok.

Oga Dickson add say im no see any compelling reason for di govnor to defect, but as for im, e stand gidigba wit di PDP.

Associate Professor of Public Law for di Rivers State University, Ritchard Wokocha say di recent resignation of govnors from di PDP mean say di party dey lose steam.

Prof Wokocha observe say for di south-south region wia Bayelsa State dey, di PDP bin dey in control until recent times, becos of di six states wey make up di South South, only di Governor of Rivers State still dey di PDP as majority of di oda State Governors don join di APC.

"Now wey almost all di Governors don comot from di party to di APC, e mean say di PDP dey almost comatose as na only Rivers State remain wey di Governor never make an official declaration. S,o e mean say di party dey deadbeat for di South-South."

E add say dis one mean say for di national level, di chances for di PDP dey grow much slimer and e naturally mean say dem dey go out of existence gradually."

Dis trend political analysts say fit lead to a one-party State for Nigeria wit di wave of defections to di ruling party wey dey happun.

Prof Wokocha note say di principle of carrot-and-stick dey play out and di overall objective na for di President to return for im second term.

"Dis show say for Nigerian politics, no be di voters dey determine who go rule but di officials, so di strategy dem dey use na to get all di official leaders for di states to dey in one direction so any strong objection no go dey," e tok.