Nigeria main opposition party fix date for National convention, set committees

Afta dia National Executive Committee (NEC) meeting for Abuja, di Peoples Democratic Party (PDP) don announce date wey dem go do dia National Convention and dose wey go be members of di committee.

Dis announcement na by di Acting National Chairman of di party, Amb Iliya Damagum wey reveal say dem don approved di conduct of di National Convention for Thursday 28th to Saturday 30th August 2025.

Di chairman also add say di NEC don also 'receive and ratify di composition of di Committee on di Zoning of National Offices ahead of di National Convention.'

Dis come afta PDP wey be di main opposition party for Nigeria, hold dia NEC meeting for Abuja to discuss several issues wey dey affect di party.

Na di 99th NEC meeting of di PDP wey dem hold for di party presidential campaign office, Legacy House, Abuja on Tuesday 27 May, 2025.

According to di party, di NEC na "one of di highest decision-making organs of di PDP" and e dey important.

Di meeting come for period wey di party dey face serious defection threat, instability and some members dey do anti-party activities.

"Di meeting na to address critical issues wey dey affect di party, wey go also include strategies for upcoming political engagements," di party for dia X post.

Who dey di PDP convention committee

Di members of di National Convention Committee na Gov Ahmadu Fintiri as Chairman, Gov. Ademola Adeleke as Vice Chairman and Gov Peter Mbah as Secretary.

Also dem announce members of di zoning committee, according to PDP statement and dem include: Gov Douye Diri as Chairman, Gov Dauda Lawal as Vice Chairman and Gov Caleb Mutfwang as Secretary.

Oda decision wey PDP make for dia meeting

According to di party chairman, di party go resolve di issue of di national secretary of di party for dia next NEC meeting.

"NEC also receive di Resolution of di South East Zonal Executive wit regard to di issue of di National Secretary of our Party. NEC resolve to consider di Resolution of di South East Zonal Executive for di next NEC meeting wey go hold on Monday, 30th June, 2025."

Even though PDP no mention or take any action on Nyesom Wike, dem say dem go rescue di nation from APC.

Di National Convention dey expected to address some issues wey dey face di party, so dem no go collapse bifor 2027 election.

Recall say for April 2027, govnors under PDP for Nigeria bin rule out any option of join bodi wit oda opposition parties ahead of 2027.

"Di PDP no go join any coalition or merger. However, di PDP as a major opposition party go welcome any party, pipo or groups wey dey willing to join dem to drag power and enthrone good leadership for 2027," di govnors tok for dia communique afta dat meeting.

Afta dat meeting, one of dia strong power wey be former Rivers state govnor and current Minister for FCT, Nyesom Wike bin knock di govnors say dem no get di power to take dat kain decision.

Wike na one of di political power wey PDP get but e currently dey work for di ruling APC and e dey clear say di party dey open eyes for am sake of di tins wey e dey tok to di party.

Howeva, di influence wey Wike get for PDP dey make am control some political powers but e say im no dey contest for 2027.

Wike influence for PDP and wetin e tok about Makinde

In di build-up to di 2023 elections, Wike bin show interest, buy form to contest to become di PDP presidential candidate but e no win di party ticket.

Former Nigeria Vice-President Atiku Abubakar win am and since den, Wike still dey para.

E dey tok against di party leadership and oda key members say dem dey wrong as dem decide to give dat ticket to di north.

Since di defeat of di party for di 2023 election, di party don witness a lot of crisis, defections and in-fighting.

For one exclusive interview wit BBC Pidgin, Wike say di party no stand a chance for 2027 if dem no put dia house in order, even as e say e no get interest to run dis time around.

Wike don tok say im no go contest for di 2027 election, sake of say im dey work wit di ruling party and e like am like dat.

Wike howeva insist say e no go defect from di party.

"I no go fit do dat kain tin, I no be fear fear man, I be weak man? how I go build house, you go come come frustrate me, make I comot, who go comot, na you go comot, I no gree you spoil house wey I build, I go dey dia."

Wike bin accuse Oyo state Govnor Seyi Makinde say na im be di architect of di problems wey dey worry di PDP.

For one statement on im X account, di former Rivers State govnor accuse key party leaders of betrayal, dishonesty, and serial violations of mutual understandings.

E say non-compliance wit agreements wey dem reach for one reconciliation meeting wey former Senate President Bukola Saraki set up, na di reason for di wahala for di party, and e allege say Govnor Makinde na di "chief culprit of dis anomaly."

Oga Wike also announce say im don pull out of all agreements wey dem don reach bifor, and im don decide to continue to fight until im get justice.

PDP inside defection rofor-rofor

Defection na one of di big crisis wey don hit PDP dis year and e no be like say e dey stop any moment soon.

Three out of di six South-South states wey be traditional stronghold of di PDP for more dan 20 year, don witness serious threat sake of defection comot from di party.

Recently, Sheriff Oborevwori wey be di Delta state govnor officially dump PDP to jump inside di ruling party APC.

Some lawmakers for different states of di kontri to comot from di PDP go di ruling party and dis dey deal huge blow for dem ahead of di 2027 Nigerian election.

Lekan Ige wey ogbonge political sabi pesin tell BBC Pidgin say PDP don lose dia popularity and stronghold for Nigeria sake of di plenti defection wey hit dem.

"PDP bin dey in charge of 11 states but as di Delta State govnor don comot now, dem just dey in charge of 10. And rumours still dey fly say di govnors of Akwa Ibom and Rivers State fit still comot to join APC.