Declan Rice make Champions League history, knack Real Madrid wit two special free kicks

Afta 338 games for im professional career Declan Rice neva ever score free-kick bifor.

Afta di 339th game e don score two.

E don only take 12 free-kicks across im entire career bifor prior Tuesday sensational 3-0 win for Arsenal over Real Madrid for di Champions League quarter-final first leg for Emirates.

With di Gunners on top but level at 0-0, di England midfielder stand up and curl round di Madrid wall and pass Thibaut Courtois to put im side ahead afta 58 minutes.

Den 12 minutes later di 26-year-old step up and do am again, to make am di first player to score two free-kicks for a Champions League knockout match.

Di unbelievable curling strike into di top corner good to di extent wey Arsenal captain Martin Odegaard and boss Mikel Arteta hold dia hands on dia heads in disbelief.

Former Real Madrid and Brazil left-back Roberto Carlos - imsef wey be master of set-piece during im career – even shock from di stands.

"I no know weda I go ever believe wetin wetin happun," Rice tell Amazon Prime afta di game.

"I don go back to my phone den evritin just dey crazy. To score my first free-kick in a game na special one. And den wen I get di second one... I just get di confidence. I dey speechless really.

"I no think say e go hit me, wetin I don do dis night, Na historic night."

Bayern Munich vs Inter Milan review

Inter Milan strike late to put demsefs in a strong position to advance into di Champions League semi-finals afta dem win di first leg of dia last-eight tie for Bayern Munich.

Di German host bin dominate di opening half hour wit England captain Harry Kane curling ball wey hit bar but dem fall to Inter first shot on target.

Di Serie A leaders score a fine goal at di end of excellent team move in di 38th minute.

Marcus Thuram show great skill to jump and flick di ball to Lautaro Martinez wit di Argentine striker firing im effort wit di outside of di boot into di roof of di net.

However, substitute Thomas Muller equalise in di 85th minute wit goal wey be like say e go save Bayern from defeat.

Di 35-year-old announce last week say im go leave di club at di end of di summer, to end a 25-year association wit di club, and e finish from close range afta Konrad Laimer low cross.

Inter quickly break up field and Carlos Augusto cross wey substitute Davide Frattesi convert to ensure say Italians leave Germany wit beta advantage.

Defeat also end Bayern 22-match unbeaten home run in di Champions League, dating back to 2021.

Di second leg for San Siro go happun on Wednesday, 16 April wia di overall winners go play either Barcelona or Borussia Dortmund for semi-final.

Na for Bayern Allianz Arena dem go play di final on 31 May.