Over 50 pipo die for stampede during football match for Guinea after referee award controversial penalty

At least 56 pipo don die inside stampede during one football match for Guinea second-largest city, Nzérékoré, goment don confam.

Reports say di incident happun afta di referee make one decision, wey send off two players from di visiting team, Labé, and award a controversial penalty kick.

Dem don launch inquiry to find pipo wey dey responsible, Prime Minister Oury Bah tok for one statement, as e call di events "tragic" and offer im condolences to di pipo wey dey mourn.

One doctor, wey no gree mention im name, tell AFP news agency say "bodies line up as far as di eye fit see inside di hospital".

"Odas lie for floor for di hallways. Di morgue don full," e add.

Local media tok say police use tear gas afta supporters of di visiting team, Labé, throw stones for di pitch in anger at di referee.

"E start wit di decision by di referee. Den fans enta di pitch," one witness tell AFP.

Videos and fotos on social media wey BBC verify show how e be outside di stadium, wit large crowds wey dey attempt to climb ova walls and plenti bodies on di ground.

Some of di pipo wey lie unresponsive for ground appear to be small pikin.

Paul Sakouvogi, one local journalist for Nzérékoré, tell BBC say dem don restrict internet access for di region, and police dey guard di entrance to di hospital wia dem dey treat pipo wey injure.

"I observe six police pick-ups position in front of di three entrances to di hospital. Dem allow only di medical staff to access di hospital, while dem tell odas make dem go back as dem take come."

Prime Minister Bah don pay tribute to di pipo wey die and promise full medical and psychological support to di pipo wey injure.

Guinea football body, Feguifoot, tok say na moment of "intense pain" and e say football suppose to "unite hearts and bring minds closer" no be to cause "tragedy and grief".

Thousands of spectators dey present wen di stampede happun for di match between Nzérékoré and Labé, local news website MediaGuinée report.

Sunday match dey part of di tournament in honour of President Mamady Doumbouya, wey seize power for one coup for September 2021.

Dem don organise similar football tournaments in honour of di junta leader for oda part of di kontri, opposition dey condemn di act as way to support di possible candidacy of Doumbouya during upcoming elections.

On Monday, di opposition group National Alliance for Change and Democracy tok say di authorities get "significant responsibility for dis serious events".

Di goment neva respond to dis allegation.

In recent months, dem don dey investigate powerful figures for Guinean football.

For July, Aboubacar Sampil, di president of di kontri football Feguifoot, become di subject of investigation into corruption and violence for football.

One junior colleague accuse Mr Sampil, wey also lead di board of directors for local team ASK, of promoting violence and trying to influence referees for di match wey ASK lose 0-1 to Milo FC.

Di latter team - Milo FC bin abandon di game and face trouble leaving di ground safely, according to documents by Feguifoot ethics body.

Among oda tins, dem don accuse Mr Sampil of bypassing protocol and appointing pipo to jobs.

E dey always deny any wrongdoing.

Additional reporting by Armand Mouko, Paul Njie and Richard Irvine-Brown