Nigerian Bar Association call on govment to rescue member and her sister wey gunmen kidnap

Di Nigerian Bar Association (NBA) don call on di federal govment to rescue one of dia members wey gunmen kidnap on her way from di recent Call to Bar Ceremony for Abuja, di kontri capital.

Tori be say gunmen kidnap Onyesom Peace Udoka wey dem newly call to Bar and her sister around di Lokoja–Okene axis for Kogi State, north central Nigeria.

Di president of di Association Afam Osigwe for statement on X say di development dey unacceptable and utterly condemnable.

"E dey heartbreaking say for time wen our nation suppose dey celebrate di future of di legal profession, young lawyers and dia families dey subjected to such harrowing ordeals.

"No family suppose endure dis trauma, and no citizen suppose live under di constant fear of insecurity on our roads," NBA tok.

Di Association call on di "federal govment and all relevant security agencies particularly di police to rise to the occasion, act with urgency, and ensure the immediate and safe release of our colleague and all odas wey dey captivity".

According to di NBA, di safety and security of Nigerians no go continue to dey treated wit levity.

Dem say na di primary duty of govment to protect di lives of dia citizens and demand intensified and sustained action to secure di kontri highways.

"Di NBA stand in solidarity wit di families of di abducted victims for dis difficult time, and we pray say God grant di victims safe and speedy return to dia loved ones."

Kidnapping na one of di most pressing security challenges for Nigeria, and e dey happun for different state of di kontri.

For di same Kogi State, some gunmen last year bin attack di Confluence University of Science and Technology and kidnap about nine students.

Di attack happun as di students dey class dey study for dia exams wey suppose start on Monday, May 13.

One statement wey di State information commissioner, Kingsley Fanwo forward to di BBC tok say "Govnor Ahmed Usman Ododo bin immediately activate di security architecture to track di kidnappers and ensure say di abducted students dey rescued and di abductors apprehended".

For May 2025, sea pirates bin kidnap13 passengers along di Isaka waterways for Okrika local govment area of Rivers State, south-south Nigeria.

Di incident wey happun on Tuesday 6 May, 2025 involve students wey bin dey travel to write dia West African Examinations Council (Waec) exams.

Mama of one of di kidnap victims, Baktah Benjamin, say her son dey among di 13 passengers wey di sea pirates kidnap, wey also include seven teenage girls.