Japan end Nigeria Super Falcons dream for di Olympics 2024 as dem waya dem 3-1

Di Nadeshiko of Japan sama Nigeria Super Falcons 3-1 to end dia 2024 Olympic medal dreams for di football event.

Di Super Falcons crash out afta dem lose all dia three Group C matches.

Nigeria bin start well to attack for di match against Japan but di Nadeshiko Japan no give dem space at all.

Japan score all dia goals for di first half through Micha Hamano for di 22nd minute,

Mika Tanaka for di 32nd and Hikaru Kitagawa for first half added time.

Nigeria manage to score one goal through Jennifer Echegini for di 42nd minute.

Nigeria go return home as dem lose all dia matches, dem concede a total of 5 goals an score only 1.

Dem bin lose 0-1 to Brazil for dia first match, 0-1 to Spain for dia second match before dis with Japan.

Dis na Nigeria Super Falcons first Olympics afta 16 years.

Second Half

Full Time: Japan 3-1 Nigeria

90+8' Referee don blow, match don end.

90+7' Chance for Japan but Fuka play am wide.

90+7' Echegini of Nigeria dey find space but Japan no gree at all.

90+5' Nigeria still dey hold ball but Japan defence no dey allow dem pass.

90+4 Nigeria dey continue to attack, dey find goal even wit few minutes for match to end.

90+1' Substitution for Nigeria Uchenna Kanu don enta, Osinachi Ohale don comot.

90' Referee add 8 minutes.

89' Opportunity for Japan but Nagano di Japan player fall down wen she dey run.

87' Chance for Nigeria! Rasheedat Ajibade play di ball to di hands of Japan goalkeeper, anoda wasted opportunity for di Super Falcons.

85' Corner kick for Nigeria, Michelle Alozie play am low as she pass am to her teammate.

83' Freekick for Japan, dem play am but Chiamaka punch am out. Japan attack again immediately but di ball go out of play.

81' Esther Okoronkwo of Nigeria drive di ball go forward but Japan defender block am as she head di ball out.

80' Substitution for Japan, Moriya don play finish R. Chiba enta.

79' Chance for Ueki of Japan but she play di ball ova di bar.

78' Nigeria get possession of di ball but Ajibade give di ball away.

77' Japan hold ball dey do long passes but e land for Esther Okoronkwo front to give Nigeria possession.

75' Substitution for Nigeria, Deborah Abiodun don comot, Esther Okoronkwo don enta.

73' Cooling break, for players to drink water.

72' Japan miss one -on -one chance to score. Hayashi fire di ball out of play, no stress for Chiamaka.

71' Echegini of Nigeria pass di ball to Toni Payne wey pass di ball to Alozie but di ball too long for her as e go out of play wen she dey run to meet di ball.

69' Nigeria hold ball now, dem dey build dia passes from back to front, Japan players full evriwia.

67' Japan dey run wit di ball toward Nigeria area, Osinachi Ohale block di ball and collect am from her leg.

65' Goal kick for Japan, Ueki carry di ball run enta Nigeria goal area but Deborah Abiodun of Nigeria clear di ball.

63' Nigeria don dey get possession of di ball, na to convert dia chances remain, Japan no dey give dem space up front.

62' Michelle Alozie of Nigeria make beta run for di left flank, she pass di ball to Ajibade wey fire shot but e land for Japan goalkeeper hand.

60'Substitution for Nigeria, Oshoala don comot Ihezuo don enta

60' Substitution for Japan, Hesegawa don comot Nagano don enta.

57' Chance for Nigeria, Asisat Oshoala and Ajibade make effort but Japan defender clear di ball to throw-in.

54' Japan get chance to score but di ball go out of play.

53' Afta VAR review No penalty! No foul! game continue

52' Referee dey check VAR

52' Japan Hayashi make attempt to score but she fall down, referee stop di game to check for possible penalty.

50' Michelle Alozie of Nigeria pass di ball to Rasheedat Ajibade but she play am hit di side net, wasted chance.

48' Japan enta dis second half with plenti confidence but Nigeria dey try get space to hold di ball.

46' Substitution for Nigeria, Okeke don comot for Nicole Payne

46' Second half don start.

First Half

Japan 3-1 Nigeria

45+6 Referee blow whistle first half don end.

45+ 6 Michelle Alozie of Nigeria do solo run, pass di ball to Asisat Oshoala but Asisat no reach di ball.

45+ 4 Japan 3-1 Nigeria

45+4 Demehin of Nigeria don foul Japan player, referee blow freekick against Nigeria. Katagawa of Japan play di freekick and she score!

45+2 Japan don collect ball from Nigeria but her strike land for Chiamaka Nigeri goalkeeper hand.

45+1 Asisat Oshoala get chance to draw level but di Japan defenders too plenti, dem force Nigeria play di ball go backwards.

45' Referee add 5 minutes.

44' Game don change as Nigeria don begin come out to attack with few minutes to end first half.

Japan 2-1 Nigeria

42' Goal! Nigeria don score, Echegini fire di ball inside net afta midfielder Christy Ucheibe give her pass.

40' Rasheedat Ajibade of Nigeria dey try run go front to attempt goal but Japan dey worry.

38' Asisat Oshoala of Nigeria dey worry di Japan defence but Nigeria neva get di result dem want.

35' Nigeria get chance but noting come out.

Japan 2-0 Nigeria

32' Goal for Japan Mina Tanaki double di lead

Japan 1-0 Nigeria

22' Goal! Japan don score, Ueki pass di ball to Hamano wey fire shot inside di Nigeria net

20' Chance for Japan! but Nigeria defender head di ball enta corner kick. Hayashi of Japan play di corner kick but e go few inches above di right post.

19' Japan carry ball from midfield drive to Nigeria goal area, play shot but e land for Nigeria goalkeeper Chiamaka hand.

17' Japan dey try hard to drag Nigeria players out but e neva work. Japan get freekick.

16' Nigeria and Japan dey drag ball for midfield sake of say both teams no gree open dia defence.

14' Foul against Japan as Moriya push Rasheedat Ajibade of Nigeria fall, referee blow foul.

14' Foul against Japan as Ueki push Michelle Alozie of Nigeria down.

12' Maika of Japan play one long ball but na off-target as e go wide out of play.

10' Throw-in for Nigeria, Okeke play am, Japan intercept di ball , Nigeria collect am back, di ball go out of play, throw -in for Nigeria again dis time Michelle Alozie take am.

8' Osinachi Ohale of Nigeria defend ball wey Ueki of Japan play near di goal post.

7. Tanaka of Japan cross give Hamano wey fire di ball straight to di post but Nigeria goalkeeper Chiamaka catch di ball without stress.

5' Nigeria Super Falcons dey attack Japan from all angles but Japan too no wan give dem space.

2’ Nigeria don begin attack from di first minute as Rasheedat Ajibade cross ball to Asisat Oshoala but Japan defender block di ball.

1’ Referee don blow whistle match don start

Line Ups

Japan starting 11: A. Yamashita, R. Ishikawa, S. Kumagai, H. Takahashi, H. Kitagawa, M. Moriya, H. Hayashi, Y. Hasegawa, M. Hamano, R. Ueki, M. Tanaka

Nigeria startling 11: C. Nnadozie, C. Okeke, O. Ohale, O. Demehin, M. Alozie, D. Abiodun, C. Ucheibe, T. Payne, J. Echegini, R. Ajibade, A. Oshoala