Video show how police wey woman call for help fatally shoot am inside her home

Illinois police release bodycam footage wey show di moments wey lead to di fatal shooting of one woman wey bin call 911 to report a suspected intruder for her home.

Di killing of Sonya Massey, 36, over Independence Day weekend don lead to criminal charges against di officer wey open fire, and draw condemnation from White House.

Dem don sack Sangamon County Sheriff Deputy Sean Grayson from di police force and charged with murder and official misconduct.

E don plead not guilty to di charges. As of Monday, demm bin dey hold am without bond.

Daniel Fultz, lawyer wey dey represent Mr Grayson, no gree comment wen BBC contact am.

On Monday, Illinois State Police release bodycam footage wey show di officers shouting at Ms Massey to put down a pot of boiling water as dem point dia pistols at her.

Di incident for di early hours of 6 July began wen Ms Massey call police to her home for Springfield, 200 miles (320km) south of Chicago, to report say she believe say someone bin don break into her property.

Officers follow her inside wen Ms Massey enter inside her house, and watch as she bin dey search for her identification.

For di video, Mr Grayson see one pot onop stove, e point am say: "We no need fire while we dey here."

Ms Massey walk to di stove to remove di cooking utensil. She and Mr Grayson be like dem laugh over her pot of "steaming hot water", before she tok two times say: "I rebuke you in di name of Jesus."

"You better [expletive] not or I swear to God I go [expletive] shoot you for your [expletive] face," Mr Grayson tok. E come draw im pistol as e shout for her to drop di pot.

"OK, I dey sorry," Ms Massey tok before she dodge.

After shooting her, di officer tok say: "Wetin else we for do? I no go collect hot [expletive] boiling water for my [expletive] face."

Di video also record Mr Grayson dey tell im police partner say she no go need medical help.

As di oda deputy bin try to go get a medical kit, di officer say: "She is done. You fit for go get am, but dat na head shot."

Mr Grayson come comot to go get im own medical kit, after di oda officer say dem fit at least try to stop Ms Massey bleeding.

On Monday, di Sangamon County State Attorney’s Office say Mr Grayson bin no dey justified for im use of force.

Inside statement, President Biden say e bin dey "heartbroken" for her family and say her death na reminder "say all too often Black Americans dey face fears for dia safety in ways many of di rest of us no dey face".

Vice-President Kamala Harris call on Congress to pass police reforms, posting on X: "Sonya Massey deserved to dey safe.

"Di disturbing footage dem release yesterday confirm wetin we know from di experience wey many don live - we get plenty work to do to ensure say our justice system fully live up to im name."

Illinois Attorney General Kwame Raoul call di footage of di shooting "horrific" inside statement on Monday.

“As di community react to di release of di footage, I urge calm as dis matter work im way through di criminal justice system," Mr Raoul tok.

Attorneys for Ms Massey family don hail prosecutors for dia fast action against Mr Grayson.

Personal injury lawyer Benjamin Crump say di footage go "shock di conscience of America".