NLC warning strike get partial compliance across Nigeria

Di two-day warning strike wey di Nigeria Labour Congress call for happun but no be as dem plan am.

Di two day strike na for 5 and 6 September and e take effect across di kontri.

Di National Union of Air Transport Employees Association of Nigeria (NUATE) and National Association of Aircraft Pilots and Engineers (NAAPE) confam say dia members go join di two-day warning strike.

Di National Union of Banks, Insurance and financial institutions Employees bin also say dem go to joinbodi wit NLC.

Oda unions also come out to tell dia members to shutdown operations ahead of di strike.

But e be like say di strike no too dey effective as NLC bin plan am.

For Lagos, Nigeria commercial capital, many Banks open for operation as against initial believe say dem no go open.

Further observation by BBC News Pidgin show say both di private and public sectors partially comply wit di warning strike directive.

While activities remain normal for some part of di kontri, schools, hospital, banks, electricity companies partially operate wey leave citizens stranded to bear di impact of di strike.

Di NLC strike also affect electricity supply for some states.

Di Kaduna Electricity Distribution Company announce say di states go get power outage until goment resolve issues wey surround strike.

“Di strike action wey make us shut down di 33KV feeders na sake of di striking workers,” Abdullahi tok say di outage go continue until di federal goment and NLC dey resolved.

Emma Ugboaja‎, Nigeria Labour Congress secretary express im satisfaction wit di level of compliance of di warning strike.

E say dem no fit force dia members to comply wit di directive.

Ugboaja explain say dia members no dey earn anytin from dia job na why dem resolve to do di warning strike becos of di high cost of petrol.

“Di president announce say dem don remove fuel subsidy, fuel wey cost180 naira come jump to 500 naira, but salary of workers still remain di same from June till today despite di high cost of living.”

Oga Ugboaja‎ add say as a union dem still dey observe di non-compliance by dia members but “we no fit put gun for dia head to withdraw services”, as members dey try sabotage dia effort.

'We neva hear from goment'

According to di Nigeria Bureau of Statistics, inflation dey 24.08 percent, wey make Nigerians dey cry about di worsening economic situation and high cost of food prices.

Oga Ugboaja‎ explain say as dia members don complain about di high cost of living and dem dey feel dia pains na im make dem tok to goment about resolution but goment fail to take action.

E add say di union go sanctions members wey no comply wit dia directives.

“E dey hard for our members to dey survive as cost of living don become difficult na im make us put pressure on goment and we hold meeting wit goment to agree on solution but dem refuse na why we carry out dis strike but members wey no comply, sanctions dey for dem by di union wey dem belong.

Di NLC secretary explain say di union neva hear from goment but e no surprise dem as goment fit dey wait make dem start di strike afta anoda 14 days notice.

“During di meeting we hold on Friday we talk say from 1 September, we don alert goment on our 14 days notice but if dem no take action afta di 14 days notice we go withdraw our services completely.”

BBC still dey monitor di warning strike.