List of Nigerian public universities wey no join Asuu strike
Wia dis foto come from, RSUST Hostel
Na for February 2021 di Academic Staff Union of Universities begin dia latest strike wey don last for seven months now.
Di public universities lecturers down tools sake of dia demand for goment to implement one agreement dem sign wit dem for 2009, plus oda demands including di issue of dia payment platform.
Since den goment and Asuu don dey do gbas-gbos and some public universities don pull out from di strike afta months of no solution
List of some universities wey comot hand from ASUU strike
Wia dis foto come from, Festus Keyamo
Na mostly di state owned universities don comot hand from di strike.
One of di latest to pull out na Kaduna State University, Kasu. Dem re-open di school on September 5, 2022.
For statement di school urge all students and lecturers to report for continuation of di academic calendar. But speaking to BBC News Pidgin, Dr Abubakar Abdullahi wey be one of di
ASUU ogas for KASU tok say na true say some of dia members don return but some of dem still dey on strike.
Kaduna Govnor Nasir El-Rufai bin tok say e no dey owe or get any problem with di school and dey wonder why dem join di ASUU strike from di start.
- Kaduna State University - Pull out September 5 2022
- Gombe State University - Dem resume August 22, 2022
- Nasarawa State University - Dem go begin online screening September 12 2022
- Federal University Wukari - Dem no ever join di strike
- Ibrahim Badamosi Babangida University, Lapai, - Dem pull out for August
- Rivers State University - Dem no join di strike
- Ignatius Ajuru University of Education - Dem no join strike
- Delta State University, Abraka - Dem back out for March 2022
- Ambrose Alli University, Ekpoma - Dem resume May, 2022
- Ekiti State University - Dem don resume now afta dem pull out
- Kwara State University Dem no follow join di strike
- Lagos State University - Dem no join strike
- Osun State University - Dem no join strike
End of Di one wey oda users dey read well well
Students sue federal goment
Meanwhile, di Socio-Economic Rights and Accountability Project (SERAP) and five university students don sue President Muhammadu Buhari before di National Industrial Court and dem dey seek order to compel di federal goment to honour di agreement dem reach with ASUU.
SERAP and di students ask di court to order di goment to implement di terms of di renegotiated 2009 Agreement and di 2020 Memorandum of Action in order to put an end to di strike and stop from further violation of di rights of di Nigerian students to quality education.
Wia dis foto come from, Other
Asuu vs FG
Di National Industrial Court of Nigeria (NICN) don chook eye inside di case wey Nigeria goment file against Asuu sake of di strike.
Nigeria goment bin approach di court to order di striking lecturers to call off dia seven months strike.Di court sit on di mata on Monday but adjourn am to 16 September, 2022.
Dis na di latest move by di federal goment to end one of di longest industial actions by Nigerian university lecturers.
ASUU members don dey strike since February 14, 2022, and all negotiations to end di strike never dey successful as di union dey insist on di renegotiation of 2009 agreement, implementation of di University Transparency and Accountability Solution (UTAS), earned allowance, among oda demands on di refurbishment of Nigerian universities.
For di letter wey dey addressed to di chief registrar of di National Industrial Court of Nigeria, dated 8 September, 2022, Minister of Labour and Employment, Dr Chris Ngige, ask di court to give di issue quick hearing in order to bring di dispute to an end. Di summons want make di National Industrial Court to among oda tins determine:
- Di legality or odawise of di on-going prolonged strike by ASUU.
- Interpret di provisions of Section 18, LFN 2004 especially as e apply to stop strike once a trade dispute dey di table of di Minister of Labour and Employment and conciliation dey on-going.
- Determine weda ASUU members dey entitled to emolument or “strike pay” during di period of di current strike in view of di national law.
- Determine weda ASUU get right to embark on strike over disputes as dem dey compel di federal goment to deploy di University Transparency and Accountability Solution (UTAS) developed by ASUU for di payment of dia members as against di Integrated Payroll and Personnel Information System (IPPIS) wey di federal goment dey use for payment of wages of all her employees.
- Determine di extent wey FG don fulfil Asuu demands since di 2020 Memorandum of Action with federal goment
- Issue order for Asuu members to resume work for dia various Universities while di NICN dey address issues for dispute in line with di provisions of di law
Wetin Asuu want?
ASUU currently dey on strike for more dan seven months.
Two of di main issues na:
- Di public universities lecturers dey demand di implementation of one agreement di federal goment sign wit dem for 2009
- Asuu dey also ginger ontop di payment platform wey goment wan use to dey pay dem. Asuu dey insist on di University Transparency Accountability Solution (UTAS) as against di federal goment own, di Integrated Payroll and Personnel Information System (IPPIS)
