اسلامي دولت ډله امریکا ته تر ټولو ستر ګواښ دی
د عکس سرچینه، Reuters
واشنګټن خبرداری ورکړی چې په نږدې کلونو کې د اسلامي دولت جنګیالي امریکا ته تر ټولو ستر ګواښ دی.
د امریکا د دفاع وزیر چک هېګل ویلي چې د امریکا هوايي بریدونو په عراق کې د جنګیالیو د پرمختګ په مخه نیولو کې مرسته کړې ده خو شونې ده چې جنګیالي بیا سره یوځای شي.
ددې ترڅنگ ښاغلي هېګل د جهاديانو له خوا د رامنځ ته شوي گواښ په اړه تت انځور وړاندې کړ.
نوموړي د اسلامي دولت ډلې په اړه وویل:
"دوى يواځې یوه ترهگره ډله نه ده، دوى ځانگړې ايډيالوجي لري، دوى پياوړي ستراتيژي او تکتيکي پوځي مهارتونه لري، دوى خورا زياتې پيسې لري".
ښاغلي هېګل زیاته کړه:
"دا له هغه څه چې موږ تر دې دمه ليدلې سوا دي. نو موږ بايد د هرڅه لپاره چمتو و اوسو او د دې لپاره يواځنې لار دا ده چې تاسو حالاتو ته ځير او بيا چمتو شي".
د عکس سرچینه، BBC World Service
بل خوا د امریکا د پوځ لوی درستیز مارټېن ډېمپسي ټینګار کړی چې په سوریه کې د اسلامي دولت پر مرکز له برید پرته دغې ډلې ته ماته ورکول شونې نه ده.
نوموړي ویلي: "دا يوۀ داسي ډله ده چې په راتلونکې کې د بشپړ ويجاړۍ ستراتيژي لري خو موږ باید ماته ورکړو".
په ورته وخت کې د امریکا ولسشمر بارک اوباما اسلامي دولت د سرطان ناروغي وبلله.
بریتانيه او امريکا اوس په هغه سړي پسي گرځي چې امريکايي خبريال جيميز فولي يې وژلى.
جهاديانو گواښنه کړې چې د يوه بل تښتول شوي خبريال سټيون ساټ لوف برخليک هم د امريکايانو راتلونکي گام پوري تړلی دی.
د عکس سرچینه، BBC World Service
څرګنده شوې چې سږ کال اوړي کې امریکا د ځانګړو عملیاتو له لارې هڅه کړې وه چې سوریه کې فولي او نور برمته امریکایان وژغوري خو عملیات یې بریالي نه شول.
تر دې وړاندې، د امریکايي خبریال جیمز فولي ګومارونکې ادارې (ګلوبل پوسټ) ویلي وو، هغه جهادیانو چې دی یې نیولی و، د خوشې کولو په بدل کې یې ۱۳۲ میلیون ډالر غوښتي وو.
د دغې ادارې مشر فیلیپ بلبوني ویلي وو چې په لومړي وار تېر کال د اسلامي دولت جنګیالیو د پېسو غوښتنه کړې وه.
فولي د ۲۰۱۲ کال د نومبر په میاشت کې تښتول شوی و او روانه اونۍ کې یې اسلامي دولت ډلې د سر غوڅولو ویډیو خپره کړه.
په دغه ویډیو کې دوی خبرداری ورکړ که امریکا په شمالي عراق کې د دوی پر ډلې خپل هوایي بریدونه و نه دروي نو دوی به یو بل امریکایی خبریال هم ووژني.
