د الجزاير لومړی وزير د يرغمل کړکېچ په اړه پر ټلوزيون وينا کوله
د الجزاير لومړي وزير ويلي د دغه هېواد غازو بټۍ د يرغمل پېښه کې د ۸ هېوادونو ۳۷ تنه بهرنيان او يو تن الجزايری وژل شوي دي.
لومړي وزير عبد المالک سلال وويل ۲۹ تنه اورپکي چې د عين اميناس بېديايي ښارګوټي سره نژدې يې د غازو پر دغې فابريکي يرغل کړی وژل شوي، او دری تنه نور ژوندي نيول شوي دي.
ده وويل په اورپکيو کې ۱۱ تنه تونسيان وو، دوه يې کاناډايان او پاتې د نورو ځايونو وو.
د غازو بټۍ يرغمل څلور ورځنی کړکېچ د شنبې/خالي په ورځ (د جنورۍ پر ۱۹ مه) هغه مهال پای ته ورسېد چې الجزايري ځواکونه دغه ځای ته ورننوتل.
پنځه تنه يرغمل لا تر اوسه ورک دي.
جاپان د دوشنبې/ګل پر ورځ وويل ۷ تنه تبعه يې وژل شوي، او دری نور يې لا تر اوسه ورک دي.
امريکايي چارواکيو د دې پخلی کړی چې د وژل شويو ترمنځ دری تنه امريکايان وو، اووه نور يې ژوندي پاتې شوي دي.
د بريتانيا لومړي وزير ډېوېډ کامرون وويل په پېښه کې دری تنه بريتانويان وژل شوي، او دری نور لا ورک دي، چې ګومان دی وژل شوي وي.
ده وويل د يرغمل کړکېچ دا په ګوته کوي چې "له هوښيار سياسي غبرګون سره بايد ځواکمن امنيتي ګام پورته شي."
په هغو بهرنيانو کې چې وژل شوي يا ورک دي د فرانسې، ناروې، ماليزيا، فليپين او رومانيا کارکوونکي هم شامل دي.
د بريد موخه
د غاز دغه بټۍ د الجزاير ختيځ کې د عين اميناس ښارګوټي سره نژدې ده
د الجزاير لومړي وزير عبد المالک سلال د يرغمل نيونې پر ځای بريد په اړه د الجزاير ځانګړيو ځواکونو پرېکړې ستاينه وکړه، او زياته يې کړه چې د يرغمل نيوونکيو موخه "د غازو بټۍ الوزول وو."
ده ټينګار وکړ "ترهګرو چې ځينې يرغمل وژلي پر سرونو يې ويشتلي دي."
د الجزاير لومړی وزير وويل يرغل نيوونکي يې هېواد ته د مالي له شمال وراوښتي، چې د الجزاير، مصر، تونس، مالي، نيجر، کاناډا او موريتانيا تبعه وو.
بریدګرو ويلي وو، دوی د روانې جنورۍ لومړيو کې په مالي کې د اورپکيو پر ضد د فرانسې مداخلې په غچ کې يرغمل نيولي وو.
د الجزاير پوليس وايي د يرغمل نيونې دغه پېښه د مختار بلمختار له لوري تنظيم شوې وه.
دی په اصل الجزايری دی چې په تېره موده کې په اسلامي المغرب کې د القاعدې له ډلې سره وران شوی، اوس د افريقا شمال لوېديځه بېديا او سمندرغاړي سيمه کې فعال دی.
