ښاغلى پيترياس تېر کال د سي اى اې مشر وټاکل شو.
د امريکا د مرکزي څارگرې ټولنې مشر ډېوېډ پيترياس او د ولسمشر اوباما ادارې ويلي دي چې د سي اى اې ريس له خپلې دندې استعفى ورکړې ده.
په يوۀ ليکلي متن کې ښاغلي پيترياس ولسمشر اوباما ته خپله استعفى وړاندې کړې او په کې يې ويلي دي چې " ښه قضاوت يې " نه دى کړى.
دۀ ويلي چې د يوې مهمې ادارې د مشر په توگه دغه ډول عمل د منلو وړ نه دى.
ښاغلى پيترياس تېر کال د سي اى اې مشر وټاکل شو.
تر هغه وړاندې ډېوېډ پيترياس په افغانستان کې د بهرنيو ځواکونو مشر و.
په يوۀ ليکلي بيان کې ښاغلي پيترياس ويلي: " له ٣٧ کلن ودني ژوند وروسته دغه ډول عمل د زغملو وړ نه دى. ما له ودني ژوند دباندې د جنسي اړيکو په ساتلو سم قضاوت نه دى کړى. دغه ډول قضاوت د يوۀ مېړۀ او د سي اى اې په څېر د يوې ادارې د مشر لپاره د منلو نه دى."
ډېوېډ پيترياس زياته کړې چې دۀ د جمعې په ورځ ( د نومبر/ نهمه) ولسمشر اوباما ته خپله استعفى وړاندې کړې او هغه منلې ده.
سملاسي به د امريکا د مرکزي څارگرې ادارې د سرپرست مشر په توگه د ښاغلي پيترياس مرستيال مايکل موريل کار پر مخ بيايي.
