په وروستیو کې عراق بیا نارامه شوی دی.
د عراق بېلابېل ښارونه د شاوخوا لسو چاودنو شاهد و، چې په لړ کې یې لږترلږه ۴۴ کسان وژل شوي او لسګونه نور ټپیان دي.
د هېواد په جنوب ناصیریه کې د فرانسې کونسلګرۍ ته څېرمه موټربم چاودنه شوې ده.
امنیتي سرچینې وايي، په وژل شوو کې ۱۱ پوځيان دي، چې دوه یې جګپوړي افسران دي.
کرکوک
د عراق پوځ وايي، کرکوک کې د نفتي بنسټونو اووه رضاکاره ملاتړي هم په یوه چاودنه کې وژل شوي او ۱۷ نور ټپیان دي.
یوه بل جګپوړي پولیس ویلي، چې له چاودېدونکو توکو یو ډک ګاډی د اوبو یوه نل ته نژدې ولاړ و، چې په چاودلو یې ګڼ کسان ووژل شول.
خو د کرکوک روغتون ډاکټر عثمان عبدالرحمن وايي، د ایمرجنسي ګاډي یې اووه مړي او ۱۷ ټپیان روغتون ته لېږدولي دي.
طوز
بل خوا، د کرکوک په جنوب کې د طوز سیمې پولیسو ویلي چې یوې چاودنې درې ولسي وګړي ووژل او شل نور یې ټپیان کړل.
سرچینه وايي، چاودنه د پولیسو پوستې ته څېرمه نن سهار وشوه.
بصره
په بصره کې هم امنیتي سرچینو ویلي چې لږترلږه په یوه چاودنه کې څلور کسان وژل شوي دي.
