د هند پلازمېنه کې له مذهبي تاوتریخوالي وروسته وضعیت کړکېچن دی
د عکس سرچینه، Getty Images
د هند پلازمېنه ډیلي کې له هغه وروسته چې د یوه مذهبي لاریون پر مهال تاوتریخوالی رامنځته شو، اوس هم د ښار له ګڼې ګوڼې په یوه ډکه سیمه جهانګیر پوره کې وضعیت تاوتریخجن دی.
د بي بي سي هندي څانګې خبریال وینت کهیر چې جهانګیر پورې سیمې ته ورغلی، په خپل رپوټ کې وايي، د ډېری بنګالي توکمه مسلمانانو په دې ګڼ مېشت سیمه کې له پېښې څو ورځې وروسته هم خلک قهریدلي ښکاري.
د تاو تریخوالي په دې پېښه کې د اووه پولیس سرتېرو په ګډون نهه کسان ټپیان شوي، چې یو پولیس په مرمۍ لګېدلی.
عیني شاهدان وايي، تاوتریخوالی له هغه وروسته پیل شو، چې د ځینو سخت دریځو ډلو په ګډون یو شمېر هندوانو د خپل یوه معبود هنومان د زوکړې کلیزې په مناسبت لاریون وکړ.
په ویډیويي رپوټونو کې لیدل کېږي چې د لاریون ځینې ګډونوال په داسې حال کې مذهبي شعارونه ورکوي، چې په لاسونو کې یې تورې او نېزې هم نیولې دي.
د یوه جومات څنګ ته د لاریون رسېدو پر مهال پرې د ډبرو ګوزارونه شوي او له همدې ځایه تاوتریخوالی پیل شوی دی.
د عکس سرچینه، Getty Images
دواړه لوري پر یوه بل د پیل کولو تور پورې کوي.
هندوان وايي، پر دوی له بامونو د ډبرو ګوزارونه شوي، خو مسلمانان بیا وايي، لاریونیانو د جومات څنګ ته پارونکې نارې وهلې او له همدې کبله لفظي شخړه راپیدا شوه.
دوی وايي د ډبرې لومړی ګوزار هم له مخالف لوري شوی.
ځايي پولیسو پلټنې پیل کړې او تر اوسه یې دې لړ کې د دوو ماشومانو په ګډون ۲۳ کسان نیولي دي.
پولیس وايي، د بهارتیه جنتا ګوند 'بي جي پي ' ځینې ځايي مشرانو هغې ادعا په هکله هم پلټنې کوي چې وايي، له بنګله دېشه راغلي غیر قانوني کډوال په دې تاوتریخوالي کې ښکېل وو.
د ډيلي تازه تاوتریخوالی په دې ښار کې د ۲۰۲۰ کال له توکمیز تاوتریخوالي وروسته تر ټولو ناوړه هغه دی، چې ۵۰ کسان پکې وژل شوي وو او ډېری مسلمانان وو.
هغه پېښې د هند په ځینې نورو شمالي ایالتونو کې د تاوتریخوالي پېښو ته ورته وې، چې د هندوانو یوه بل معبود رام نوامي مېلې پر مهال د جوماتونو تر څنګ د لاریونونو تېرېدو پر مهال پیل شوې وې.
د جهانګیر پورې له پېښې وروسته ۱۳ اپوزېسیون ګوندونو په یوه شریکه اعلامیه کې په دې تړاو د لومړي وزیر نرېندرا مودي پر خاموشۍ حیرانتیا ښوولې.
په اعلامیه کې ویل شوي: ''دا ښيي چې ځينې شخصي وسله والې ډلې رسمي ملاتړ له ځان سره لري. ''
په ۲۰۱۴ کال کې چې د ښاغلي مودي توکمپال حکومت رامنځته شو، په هند کې توکمیز تاوتریخوالی ډېر شوی دی.
مذهبي مېلې او لاریونونه په ځانګړي ډول د دغه ډول تاوتریخوالي پیلېدو لاملونه بلل کېږي.
