"درې نیم لکه کسانو کې" هغه سړی چې خزانه یې ومونده

ناپېژاند سړي د سرو سپینو او نورو ګرانبیه توکو هغه خزانه ومونده چې له لسو کلونو مخکې د عتیقه اثارو کلیکسونر په راکي غرونو کې پټه کړې وه.

خزانه د میسو یا برنزو داسې صندوق کې ده، چې په ۱۳ میلادي پېړۍ کې جوړ شوی دی.

دا صندوق له سرو سپینو سره ۹ کیلوګرامه وزن لري.

دا صندوق د ناویاتو یا کمیابو سیکو، یاقوت، زمروت، الماس، عتیقه مجسمو او له تاریخ مخکې طلايي هندارو په ګډون له پخوانيو ګرانبیه ډبرو ډک دی.

دې صندوق کې د ګرانبیه توکو ارزښت له یو میلیون ډالرو ډېر اټکل شوی دی.

د عتیقه اثارو کلیکسونر ۸۹ کلن فارسټ فن له لسو کلونو ډېر مخکې دا صندوق په غره کې په دې هیله پټ کېښود، چې یو نه یو څوک یې پیدا کړي.

د نوې مکسیکو دا میلیونر وايي، دا خزانه یې راکي غرونو کې د ستورو د خیمې لاندې د لویو ډبرینو غرونو په ځنګلیزو شنو کې وه. او له دې ځای نه چې ما لس کاله وړاندې پټه کړې وه ښورېدلې نه وه.

ښاغلي فن ویلي، د خزانې موندونکی نه غواړي چې وپېژندل شي، خو ده ته یې د صندوق انځورونه استولي او اوس باوري دی چې دا خزانه موندل شوې ده.

* د څاه په تل کې ۹۰۰ کلنه خزانه موندل شوې

* د ناپېلیون روسۍ خزانه پسې لالهاند پلټونکي

نوموړی وايي، د خزانې د پټولو یوه موخه یې هم طبیعت ته د خلکو بلل و.

ښاغلي فن هغو کسانو ته مبارکي ویلې چې دې سیالۍ کې یې ګډون کړی دی.

نوموړي له یوې ځايي رسنۍ سره خبرو کې ویلي: ټیک نه پوهېږم، لږ خوشال یم. خو لږ خپه هم یم چې نور دا لټون تمام شو.

د خزانې موندلو نښې

نوموړي د دې خزانې ۹ نښې هم په هغه ۲۴ بنده شعر کې ویلې وې، چې د نوموړي د ژوندلیک کتاب کې پر ۲۰۱۰ کال خپور شوی دی.

له هغه راهیسې ډېر کسان د دې خزانې د موندلو لپاره غرونو ته لاړل.

ښاغلی فن اټکلوي چې نږدې درې لکه پنځوس زره کسان د دې خزانې د موندلو لپاره د امریکا نیو مکسیکو ایالت ته ورسېدل.

ویل کېږي ډېرو خلکو د دې خزانې د موندلو لپاره خپل کار روزګار او ژوند پرېښود او څو کسان هم دې لار کې مړه شول.

وروستی کس هم درې میاشتې مخکې د خزانې موندلو په ارمان او لټون کې مړ شو.