لیبیا ته د ترکیې پوځ استولو خلاف د جنرال حفتر توند غبرګون
د عکس سرچینه، Getty Images
د ترکیې هغه پرېکړه چې لیبیا ته به د هغه حکومت ملاتړ لپاره پوځیان لېږي، چې ملګري ملتونه یې ملاتړ کوي، د هېواد په ختیځ کې د جنرال خلیفه حفتر په مشرۍ مخالفو ځواکونو توند غبرګون څرګند کړی.
د افریقايي هېوادونو ټولنې هم پر دې پرېکړه اندېښنه څرګنده کړې.
جنرال حفتر چې د لیبیا ختیځ کې یې ځینې سیمې په کنټرول کې دي، د جنورۍ پر څلورمه له یوه ځايي ټلویزیونه وینا کې له ټولو لیبیایانو غوښتي چې د خپلې خاورې دفاع لپاره وسله واخلي.
نوموړي د ترکیې ولسمشر رجب طیب اردګان 'لیونی سلطان ' بللی، چې په وینا یې غواړي د عثمانیه امپراتورۍ پر یوه پخوانۍ برخه بیا ولکه ټینګه کړي.
د عکس سرچینه، AFP
د ترکیې پارلمان وړمه ورځ (پنجشنبه جنوري دویمه) په طرابلس کې د لیبیا حکومت ملاتړ لپاره د پوځيانو استولو طرح تایید کړه.
د دغې مسودې له مخې به د جنرال حفتر پر ضد جګړه کوونکو لیبیايي پوځیانو لپاره روزونکي او پوځي سلاکاران لیبیا لېږل کېږي. د جنرال حفتر ځواکونو د پلازمېنې نیولو لپاره هم بریدونه کړي دي.
ترکیې کې چارواکي په دې باور دي چې د لیبیا کړکېچ په دغه هېواد کې د دوی ګټو ته ګواښ کېدای شي.
بل لور ته د افریقايي ټولنې مشر وايي، په لیبیا کې سیاسي ګواښونه او پوځي لاسوهنه یوازې د مخامخ ښکېلتیا خطر زیاتوي.
د ملي پوځ په نامه ځواک چې د لیبیا پر ډېره برخه کنټرول لري، له ډېرې مودې راهیسې هڅه کوي، پلازمېنه طرابلس ونیسي او ترکیه غواړي مخه یې ونیسي.
بل لور ته د لومړي وزیر فایز سراج په مشرۍ حکومت چې (د ملي وفاق حکومت بلل کېږي) د هېواد په ختیځ کې د یاغیانو له بریدونو سره مخامخ دی.
د عکس سرچینه، Reuters
ښاغلي اردګان یوه میاشت مخکې ویلي و، چې د ښاغلي سراج حکومت لیبیا ته د ترکي پوځیانو لېږلو غوښتنه کړې او دوې هوکړې لاسلیک شوې، چې له مخې به یې هلته پوځیان استول کېږي.
دغه راز ترکیې حکومت په مدیترانه کې د سمندري حدودو ټاکلو او له دغې سیمې د نفتو یا تېلو ایستلو یوه هوکړه کړې، چې یونان، اروپايي ټولنه او امریکا متحده ایالات یې مخالف دي.
د جنرال حفتر ځواکونو تېر کال دوبي کې وویل، د لیبیا له حکومت سره د ترکیې د ملاتړ له کبله به د ترکیې پر هدفونو بریدونه وکړي. اردن، متحده عربي امارات د جنرال حفتر ملاتړي دي.
