د خیبر پښتونخوا ۱۵ کسیزه لنډ مهالې کابینه؛ "یوازې یوه ښځه پکې ده"

په خیبرپښتونخوا کې لنډمهالې ایالتي کابینه داسې مهال کار پیلوي چې څو ورځې وړاندې هلته ایالتي اسامبلۍ منحل شوه او د نویو ټاکنو لپاره مهال وېش اعلان شو.

چارسمبالې کابینې د مشر وزیر اعظم خان په مشرۍ کار پیل کړی.

د دې کابینې سند د خیبرپښتونخوا د والي غلام علي لخوا لاسلیک شوی دی.

مخکېنۍ کابینه او ایالتي اسمبلۍ د عمران خان په مشرۍ د تحریک انصاف ګوند په غوښتنه منحل شوې وه.

بل خوا په داسې حال کې چې عمران خان او ګوند یې د خیبرپښتونخوا او پنجاب ایالتي اسمبلیو او دارنګه د ولسي جرګې یو شمېر څوکیو ته د ټاکنو په تیاریو بوخت دي، په عمران او د ګوند پر نورو غړو یې فشارونه هم زیات شوي دي.

په همدې لړ کې د ترهګرۍ ضد محکمې قاضي راجه جواد عباس حسن د هغو لیکونو په ځواب کې ګڼ خبرداري صادر کړي چې عمران خان د پاکستان پر ملي ټلویزیون او ولسي جرګې که د خپلو پلویانو د برید په قضیو کې باید ځواب ووایي.

د پنج شنبې ورځې په محاکمه کې د عمران خان حقوقي ټیم د محکمې پرېکړې وننګولې.

د عمران خان وکیل نعیم حیدر ویلي، ترهګرۍ ضد محکمې دوسیه باید اړوند محکمې ته ونه لېږل شي. ځکه په ولسي جرګه او ملي ټلویزیون برید ته په دوسیه کې د ترهګریزې کړنې بڼه ورکړل شوې په داسې حال کې چې د دوی لاریون سوله ییز وو او د قانون په چوکاټ کې یې له خپل حقه ګټه اخیستې.

په دې اړه له بحثونو وروسته محکمه بلې نېټې ته ځنډول شوې او ټاکل شوې چې د راتلونکې فېبرورۍ په ۹ نېټه ترسره شي.

بل خوا، د پاکستان دفاع وزیر خواجه اصف په یوه ټلویزیوني مرکه کې ویلي، داسې کوم پلان نشته چې له مخې یې عمران خان باید ونیول شي.

نوموړی وایي عمران خان د دې وېرې وړاندوینه په خپله کړې.

خواجه اصف وایي عمران خان هڅه کوي چې "په قضایي سیستم" فشار راولي، چې حالات په خپل ګټه را وڅرخوي.

خو نوموړی وایي، که قانون یې د نیولو حکم وکړي، بیا به د نورو پخوانیو لومړیو وزیرانو، چارواکو او کورنیو په شان یې دوی هم زندان ته واچول شي.

د عمران خان په مشرۍ د تحریک انصاف ګوند یو مهم غړی فواد چودري یوه ورځ د مخه نیول شوی. د فواد چودري لپاره د دوو ورځو زندان حکم صادر شوی او ټاکل شوې د جنورۍ په ۲۷ محکمې ته حاضر کړای شي.