د سوریې دولتي تلویزیون وايي له پلازمېنې دمشق سره نژدې د دوما په ښارګوټي کې یوه څرخي الوتکه راغورځېدلې ده.
تېره میاشت هم مخالفو وسله والو ویلي و، چې یوه حکومتي څرخي الوتکه یې په دمشق کې راغورځولې ده.
بل پلو د اقتصادي چارو کارپوهانو، بهرنیو دیپلوماتانو او د سوریې حکومت څخه تللو کسانو په ګډون یوه ډله چې د څه باندې شپېتو هېوادونو استازي پکې دي نن له هاګ سره نژدې غونډه کوي.
دوی له واکه د ولسمشر بشارالاسد د کمزوري کولو او له واکه د لرې کولو په موخه پر نویو اقتصادي لارو خبرې کوي.
د سوریې د ملګرو دغه ډله به د سوریې پر حکومت د اغېزمنو بندیزونو او له ولسمشر اسد سره د پټو مالي مرستو د بندولو پر سر خبرې وکړي.
