په المپيک لوبو کې به شاوخوا يولس زره لوبغاړي برخه اخلي او په هيله به وي چې د ١٠٠٠ مډالونو له ډلې يې ځينې په برخه شي

د دغو لوبو پرانيستونکې دستورې د بيجينگ په ( د مرغۀ ځاله ) لوبغالي کې ترسره کيږي .

پرانيستونکې دستورې به تر درو ساعتونو پورې روانې وي چې د افغانستان پر وخت د مازديگر په څلور بجې او ديرش دقيقې پيليږي .

په پرانيستونکې غونډه کې د نړۍ بيلا بيل مشران برخه اخلي چې پکې د متحدو ايالاتو ولسمشر بوش ، د برتانيا لومړى وزير گورډن برون او د افغانستان ولسمشر حامد کرزى هم شامل دي .

د لوبو تر پيل وړاندې د بيجينگ د هوا پر ککړتيا او د چين د بشري حقونو پر ريکارډ ډيرې نيوکې وشوې .

خو د بيجينگ د المپيک لوبو د تنظيموونکو وياند سن ويد وويل چې دوى په هيله دي چې دغه لوبې به تر ټولو سترې او ښې وي .
دغه لوبې به د اگست تر ٢٤ نېټې ( وږې دريمه ) پورې روانې وي او په زرگونو لوبغاړي به پکې په ٢٨ بيلا بيلو لوبو کې له يو بل سره سيالۍ کوي .

ټول يولس زره لوبغاړي په درې سوه دوو سياليو کې د شاوخوا زرو مډالونو لپاره خولې تويوي .

هيله دا ده چې دغه لوبې به د نړۍ په لرو بر کې شاوخوا څلور ميليارده انسانان د تلويزيون په پردو وويني .