دا لا معلومه نه ده چې د يوې کورنۍ اووه غړي د چا په توغنديو وژل شوي دي

د تيرې شپې ( چارشنبې \پنجشنبې ) په نښتو کې د يوۀ توغندي د لگيدو له امله د يوې کورنۍ اووه غړي ووژل شول .

په دغه پېښه کې پنځه ماشومان او د هغوى مور و پلار يو ځاى ووژل شول .

دوى په سوات کې هغه مهال ووژل شول چې د شپې له خوا يې پر کور توغندى ولگيد .

دا لا معلومه نه ده چې دغه توغندى د پاکستاني پوځ له خوا توغول شوى و که ځايي وسله والو طالبان توغولى و .

د پاکستان پوځ د چارشنبې په ورځ ويلي و چې دوى لږ تر لږه ٢٥ اورپکي وژلي دي او پنځه سرتيري يې له لاسه ورکړي دي .

وسله وال طالبان د پاکستاني پوځ دغه ادعا نه مني او وايي د دوى يوازې پنځه کسان په نښتو کې وژل شوي دي .